پاکستان اسٹاک ایکسچینج نے نئے سال کے پہلے دن نیا ریکارڈ قائم کرلیا۔
کاروباری ہفتے کے تیسرے روز 100 انڈیکس میں 2009 پوائنٹس کا اضافہ ہوا اور انڈیکس ایک لاکھ 17 ہزار 136 کی سطح پر بند ہوا۔
یہ بھی پڑھیں اڑان پاکستان پروگرام نے پاکستان اسٹاک مارکیٹ پر کیسے مثبت اثرات ڈالے؟
پاکستان اسٹاک ایکسچینج میں بدھ کو کاروبار کے آغاز پر مثبت رجحان دیکھنے میں آیا، ٹریڈنگ کے دوران اسٹاک ایکسچینج میں ہنڈرڈ انڈیکس میں 2000 سے زیادہ پوائنٹس کا اضافہ ہوا، گزشتہ روز کے اختتام پر پاکستان اسٹاک ایکسچینج میں ہنڈرڈ انڈیکس 132 پوائنٹس کی کمی کے ساتھ ایک لاکھ 15 ہزار 126 پوائنٹس کی سطح پر بند ہوا تھا۔
اسٹاک مارکیٹ کے ماہر محسن مسیڈیا نے کہاکہ ہم پہلے ہی بتا چکے تھے کہ مارکیٹ اس ہفتے ایک لاکھ 17 ہزار کے گرد گردش کرےگی۔
انہوں نے کہاکہ اڑان پاکستان پروگرام اور ساتھ ہی کچھ سیکٹرز ایسے ہیں جو بہتر کارکردگی دکھا رہے ہیں۔ آٹو موبیل سیکٹر، بینکنگ سیکٹر، آئل اور گیس کے ساتھ ساتھ آئی ٹی سیکٹر بھی بہتر کارکردگی دکھا رہا ہے۔
ماہر اسٹاک مارکیٹ شہریار بٹ نے کہاکہ نئے سال کا آغاز اسٹاک مارکیٹ سے اچھی خبر کے ساتھ ہوا، گزشتہ سال کو پاکستان کی تاریخ میں اسٹاک مارکیٹ کے لیے یاد کیا جائے گا کیوں کہ 2024 میں ہم نے تاریخی کارکردگی دیکھی۔
انہوں نے کہاکہ امید ہے سال 2025 بھی اسٹاک مارکیٹ کا سال ہوگا۔ لگتا ہے ’اڑان پاکستان‘ کے 5 سالہ پروگرام کے بعد پاکستان کی برآمدات بڑھیں گی۔
یہ بھی پڑھیں پاکستان اسٹاک ایکسچینج منفی رجحان کی زد میں
انہوں نے مزید کہاکہ یہاں یہ بات اہم ہے کہ نئے سال کے آغاز پر معیشت کی ترقی کے لیے حکومت کی ترجیحات کیا ہوں گی۔
