سپریم کورٹ نے گزشتہ 2 ماہ کے دوران نمٹائے گئے مقدمات کی تفصیلات جاری کردی ہیں۔
سپریم کورٹ کی جانب سے جاری اعلامیے میں بتایا گیا ہے کہ چیف جسٹس یحییٰ آفریدی کی قیادت میں عدالت نے مقدمات کے فوری فیصلے جاری کرنے کے عمل کو تیز کیا اور 28 اکتوبر 2024 سے 3 جنوری 2025 تک 7482 مقدمات نمٹائے۔
یہ بھی پڑھیں: سپریم کورٹ: زیرالتوا مقدمات کی تعداد 60 ہزار سے کم ہو کر 58 ہزار 487 رہ گئی
اعلامیے کے مطابق، مقدمات کی منصوبہ بندی، وسائل مختص کرنے اور انتظامی بہتری سے عدالتی کارکردگی میں اضافہ ہوا، عدالتی اصلاحات کے تحت ای حلف نامہ اور فوری تصدیق شدہ کاپیوں کی فراہمی شروع کی گئی۔
سپریم کورٹ اعلامیے میں کہا گیا کہ عوامی شمولیت کے لیے قانونی ماہرین، فریقین اور سول سوسائٹی سے رائے لینے کا عمل متعارف کرایا گیا، چیف جسٹس کے دور دراز اضلاع کے دوروں اور ضلعی عدلیہ کی کارکردگی بہتر بنانے پر توجہ دی گئی۔
یہ بھی پڑھیں: جسٹس یحییٰ آفریدی کے چیف جسٹس بننے کے بعد سپریم کورٹ میں کیا بدلا؟
اعلامیے کے مطابق، انصاف کی فراہمی یقینی بنانے کے لیے ضلعی عدلیہ کے وسائل میں بہتری کے اقدامات کیے گئے، سپریم کورٹ میں نئے مقدمات کے اندراج کی تعداد 2950 رہی، عدالتی نظام کو شفاف اور مؤثر بنانے کے لیے جدید آئی ٹی سسٹم کا انضمام کیا گیا۔
سپریم کورٹ کے اعلامیے میں کہا گیا ہے کہ عوام کی ضروریات کے مطابق عدالتی نظام کو جوابدہ اور آسان بنانے کی کوششیں کی جا رہی ہیں۔
