پاکستانی شوبز انڈسٹری کی معروف اداکارہ نیلم منیر نے حال ہی میں ازدواجی زندگی کی شروعات کی ہیں۔ رپورٹس کے مطابق اداکارہ کے شوہر کا تعلق دبئی سے ہے اور وہ ایک کاروباری شخص ہیں۔ اداکارہ کی جانب سے نکاح کی تصاویر شیئر کیے جانے پر اکثر صارفین کی جانب تنقید بھی کی جا رہی تھی جس کا جواب اب پاکستانی اداکارہ و میزبان مشی خان نے دیا ہے۔
مشی خان نے فوٹو اینڈ ویڈیو شیئرنگ ایپ انسٹاگرام پر ایک ویڈیو شیئر کرتے ہوئے کہا کہ انہیں بہت خوشی ہے کہ نیلم منیر کی شادی ہوئی ہے اور وہ شادی کی تمام تقریبات میں انتہائی خوبصورت لگ رہی تھیں۔ مشی خان کا کہنا تھا کہ نیلم منیر کے شوہر کے بارے میں چہ مگوئیاں کی جا رہی ہیں کہ وہ شیخ ہیں اور نیلم نے پیسے کے لیے شادی کی ہے اور یہ شادی زیادہ دیر کے لیے نہیں چلے گی۔
یہ بھی پڑھیں: اداکارہ نیلم منیر کے شوہر کون؟ تفصیلات سامنے آگئیں
مشی خان نے ناقدین کو آڑے ہاتھوں لیتے ہوئے کہا کہ کبھی کسی کی خوشی میں خوش بھی ہو لیا کریں، انہوں نے سوال کیا کہ پاکستان میں جب رشتے ہوتے ہیں تو کیا آپ پیسے نہیں دیکھتے، لڑکے کی آمدنی نہیں دیکھتے جب عام گھروں میں یہ چیز دیکھی جاتی ہے تو اداکار ایسا کیوں نہیں کر سکتے۔
View this post on Instagram
ان کا مزید کہنا تھا کہ ضروری نہیں کہ عرب کا روایتی لباس پہنیں تو آپ شیخ ہی ہیں اس لیے عقل کا استعمال کریں اور نیلم منیر کی شادی کے لیے اچھے اچھے کمنٹس کریں اس معاملے میں کنجوسی کا مظاہرہ نہ کریں۔
واضح رہے کہ مشی خان ایک معروف پاکستانی ٹیلی ویژن اداکارہ اور میزبان ہیں، ان کے قابل ذکر ٹیلی ویژن پروجیکٹس میں عروسہ، عجائب گھر، بوٹا فرام ٹوبہ ٹیک سنگھ، سات پردوں میں اور دیگر شامل ہیں۔ وہ گزشتہ کئی سالوں سے کے ٹو ٹی وی پر مارننگ شو کی میزبانی کر رہی ہیں اور اکثر حالات حاضرہ، تنازعات اور شوبز کے تازہ ترین واقعات پر اپنی رائے کا اظہار کرتی رہتی ہیں۔
