وفاقی وزیر اطلاعات عطا تارڑ نے کہا ہے کہ کھیل کو سیاست میں اور سیاست کو کھیل میں شامل نہ کیا جائے، ملک کے بارے میں مثبت سوچ رکھیں، اگر آپ نے سیاسی قیادت، سیاسی جماعتوں پر تنقید کرنی ہے تو ضرور کریں مگر اپنے دفاعی اداروں اور معیشت پر تنقید نہ کریں کیونکہ اس سے سب کا اجتماعی نقصان ہوتا ہے۔
اسلام آباد میں میڈیا کرکٹ لیگ کی افتتاحی تقریب کے موقع پر صحافیوں سے گفتگو کرتے ہوئے وزیر اطلاعات عطا تارڑ نے کہا کہ اب تو بانی پی ٹی آئی عمران خان نے بھی کہہ دیا ہے کہ معیشت مستحکم ہے، باہر بیٹھے لوگوں کو بھی سیکھنا چاہیے۔
یہ بھی پڑھیں: چیمپیئنز ٹرافی 2025 میں اہم ترین پاک بھارت میچ کب کھیلا جائے گا؟
انٹرنیٹ کی بندش سے متعلق سوال کے جواب میں انہوں نے کہا کہ ماضی میں کچھ رکاوٹیں تھیں مگر انٹرنیٹ اسپیڈ میں اب بہتری آئی ہے، اس حوالے سے بغیر شواہد کے سیاسی باتیں کی جارہی ہیں، دنیا کے کئی ممالک میں انٹرنیٹ کی فراہمی میں تکنیکی مسائل آئے ہیں لیکن ہمارا سسٹم کافی بہتر ہے، اس حوالے سے بےبنیاد دعوے کیے جارہے ہیں، انٹرنیٹ اسپیڈ میں آگے مزید بہتری آئے گی، پاکستان میں انٹرنیٹ کے ریٹس دنیا میں سب سے کم ہیں۔
انہوں نے کہا کہ غیرملکی کرکٹ ٹیموں کی پاکستان آمد سے نہ صرف کرکٹ اور دیگر کھیلوں کی بہتری ہوگی بلکہ اس سے نوجوانوں کو قریب سے کرکٹ دیکھنے، سیکھنے اور پرانی یادوں کو تازہ کرنے کا موقع بھی ملے گا، پاکستان کرکٹ ٹیم نے گزشتہ چند ماہ کے دوران کئی کامیابیاں حاصل کیں، اب چیمیئنز ٹرافی کا انعقاد پاکستان میں ہونے جارہا ہے جس پر قوم بہت زیادہ خوش ہے کہ اتنے عرصہ کے بعد پاکستان اس سطح کے ایونٹ کی میزبانی کرنے جارہا ہے۔
یہ بھی پڑھیں: آئی سی سی کا کرکٹر آف دی ایئر ایوارڈز کے لیے نامزدگیوں کا اعلان، 2 پاکستانی پلیئرز بھی شامل
انہوں نے کہا کہ پاکستان کے پاس اس طرح کے ایونٹس کی میزبانی کرنے کی مکمل صلاحیت موجود ہے، ہمارے پاس کرکٹ گراؤنڈز کا انفراسٹرکچر بھی موجود ہے، چیئرمین پی سی بی محسن نقوی وزیراعظم شہباز شریف کی قیادت میں بہت اچھا کام کررہے ہیں، قذافیا سٹیڈیم سمیت مختلف اسٹیڈیمز کی تزئین و آرائش کا کام بھرپور طریقے سے جاری ہے۔
عطا تارڑ نے کہا کہ جیسے ہم نے شنگھائی تعاون تنظیم (ایس سی او) سربراہی اجلاس کا انعقاد کرکے ثابت کیا کہ پاکستان بڑے بڑے بین الاقوامی ایونٹس کی میزبانی کی صلاحیت رکھتا ہے، اسی طرح ہمارے پاس چیمیئنز ٹرافی کا انعقاد کرنے کی بھی صلاحیت ہے، مہمان ٹیموں کی خوب مہمان نوازی کی جائی گی، اس حوالے سے محسن نقوی بہت محنت کررہے ہیں۔
یہ بھی پڑھیں: اڑان پاکستان پروگرام نے پاکستان اسٹاک مارکیٹ پر کیسے مثبت اثرات ڈالے؟
وزیر اطلاعات نے کہا کہ چیمپیئنز ٹرافی کے پاکستان میں انعقاد سے ملک کا تشخص اجاگر ہوگا اور دنیا بھر میں پاکستان کی ساکھ بحال ہوگی، اس کے علاوہ کرکٹ کے کھیل کو مزید فروغ ملے گا، نوجوان اور کرکٹ شائقین گراؤنڈ میں جاکر میچز دیکھیں گے، پاکستان میں چیمپیئنز ٹرافی کے دوران ایک جشن کا سماں ہوگا۔
انہوں نے کہا کہ 2025 خوشخبریوں کا سال ہے، معاشی استحکام، مہنگائی میں کمی، اسٹاک ایکسچینج کا مثبت رجحان، پالیسی ریٹ میں کمی، غیرملکی زرمبادلہ میں اضافہ اور اڑان پاکستان جیسے پروگرام کا آغاز ظاہر کرتا ہے کہ پاکستان درست سمت کی جانب گامزن ہے۔
انہوں نے کہا کہ شہباز اور شاہین کی طرح اڑان بھرنا پاکستان کا وژن ہے، اڑان پاکستان میں کھیلوں کے فروغ سے متعلق اقدامات بھی شامل ہیں، میڈیا کرکٹ لیگ میں جیتنے والی ٹیم کی حوصلہ افزائی کے لیے وزارت اطلاعات و نشریات کی جانب سے انعام کا اعلان کیا جائے گا۔
