انٹرنیشنل کرکٹ کونسل (آئی سی سی ) کی جانب سے بھارت اور پاکستان کے درمیان چیمپیئنزٹرافی 2025 اور27-2024 کے آئی سی سی ایونٹس کے لیے ہائبرڈ ماڈل کا اعلان کردیا گیا ہے، جس کے بعد اب آئی سی سی چیمپیئنز ٹرافی کے شیڈول کا اعلان بھی جلد کردیا جائے گا۔
تاہم، بھارتی میڈیا نے دعویٰ کیا ہے کہ چیمیئنز ٹرافی میں روایتی حریفوں بھارت اور پاکستان کے درمیان ٹاکرا ہائبرڈ ماڈل کے مطابق کولمبو یا دبئی میں ہوگا اور دونوں ٹیموں کے مابین یہ میچ 23 فروری کو کھیلا جائے گا۔
یہ بھی پڑھیں: آئی سی سی نے چیمپیئنز ٹرافی اور27-2024 تک کے تمام ایونٹس کے لیے ہائبرڈ ماڈل کا اعلان کر دیا
خیال رہے کہ جمعرات کو آئی سی سی نے 2025 کی چیمپیئنز ٹرافی میں تعطل ختم کرنے میں کامیابی حاصل کرلی تھی، جس میں ہائبرڈ ماڈل پر اتفاق کیا گیا اور جس کے تحت ایونٹ میں بھارت کے میچ کسی نیوٹرل مقام پر ہوں گے۔
آئی سی سی کی جانب سے جاری اعلامیے کے مطابق پاکستان کی جانب سے پیش کیے جانے والے فارمولے کے مطابق بھارت کے لیے نیوٹرل مقام قبول کرنے کی صورت میں بھارت کی میزبانی میں ہونے والے آئی سی سی ایونٹس میں پاکستان کے بھارت کے ساتھ میچز بھی نیوٹرل مقام پر ہوں گے۔
یہ بھی پڑھیں: چیمپیئنز ٹرافی ٹورنامنٹ پاکستان کی عزت ہے، کوئی حرف نہیں آنے دیں گے، محسن نقوی
آئی سی سی چیمپئنز ٹرافی 19 فروری سے 9 مارچ 2025 تک شیڈول تھی تاہم نئی صورت حال کے بعد اب اس کا اعلان ہونا باقی ہے۔ کل 8 ٹیموں کو 4 کے 2 گروپوں میں تقسیم کیا جائے گا، ہر گروپ سے سرفہرست 2 ٹیمیں ون ڈے ٹورنامنٹ کے سیمی فائنل میں پہنچ جائیں گی۔ پاکستان دفاعی چیمپیئن کے طور پر ٹورنامنٹ میں شرکت کرے گا۔
