حکومت کی طرف سے آئی ٹی اور ٹیلی کام کے شعبے میں بہتری کے اقدامات کا سلسلہ جاری ہے جس کی وجہ سے ٹیلی کام سیکٹر میں ترقی دیکھنے مل رہی ہے۔
انٹرنیٹ کی سروس میں بہتری اور اس میں موجود مسائل دور کرنے کے لیے حکومت نے ’2 افریقہ کیبل‘ پراجیکٹ کا آغاز کردیا ہے۔
حکومت نے دنیا کے سب سے بڑے سب میرین انٹرنیٹ کیبل نظام ’2 افریقہ‘ کی لینڈنگ ہاکس بے کیماڑی ٹاون کراچی میں قائم کر دی ہے جس سے ملک میں انٹرنیٹ سروس کی رفتار میں بہتری آئے گی۔
یہ منصوبہ 45,000 کلومیٹر طویل زیرِ سمندر کیبل نیٹ ورک پر مشتمل ہے اور 33 ممالک میں 46 لینڈنگ اسٹیشنز کو جوڑتا ہے۔
پاکستان میں اس پراجیکٹ کے آپریشن کی ذمہ داری ٹرانس ورلڈ ایسوسی ایٹس کو سونپی گئی ہے۔
یہ بھی پڑھیے:شارک سب میرین کیبل کو نہیں کاٹ سکتی، چیئرمین پی ٹی اے حفیظ الرحمان
ملک میں ٹیلی کام کے شعبے کو ترقی دینے کے حکومتی اقدامات کی وجہ سے سال 2023 سے 2024 تک ملک میں ٹیلی کام کی آمدنی 955 بلین روپے تک پہنچ گئی۔
پاکستان ٹیلی کمیونیکیشن حکام کی کاوشوں سے پاکستان گلوبل سائبر سیکیورٹی انڈیکس 2024 رینکنگ میں 79ویں سے 40ویں نمبر تک پہنچ گیا۔
واضح رہے کہ پاکستان دنیا کے ان 37 ممالک میں شامل ہوگیا ہے جنہوں نے ویب ٹرسٹ آڈٹ شدہ نیشنل پبلک انفراسٹرکچر قائم کی جس سے ملک میں سائبر سیکیورٹی اور ڈیجیٹل سرٹیفیکیشن کے نظام میں نمایاں بہتری آئے گی۔
