فیصل آباد سے تعلق رکھنے والے خطاط امتیاز حیدر نورانی نےاردو ترجمے کے ساتھ دنیا کا سب سے بڑا قرآن مجید لکھنے کی سعادت حاصل کی ہے۔
انہوں نے وی نیوز سے گفتگو کرتے ہوئے بتایا کہ اس کے ایک صفحے کی لمبائی 41 فٹ،چوڑائی 53 انچ ہے اورقرآن مجید کا نسخہ 31 صفحات پر مشتمل ہے۔
امتیاز حیدر نورانی کا کہنا ہے کہ رمضان المبار ک نزول قرآن کا مہینہ ہے اس لیے انہوں نے اس قران کی کتابت2سال قبل رمضان کے مہینے میں مکمل کی تھی۔
‘اس کی کتابت 13 رجب کو حضرت علی رضی اللہ عنہ کے یوم ولادت پر شروع کی گئی تھی اوراس کا اختتام 27 رمضان المبارک کو کیا گیا۔ ایک رمضان درمیان میں آیا اور دوسرے رمضان کی ستائیسویں رات کو اسے مکمل کیا گیا۔ یہ تقریبا 425 دن بنتے ہیں۔’
انہوں نے بتایا کہ قرآن مجید کے اس نسخے کی کتابت کے دوران قرآنی آیات سیاہ رنگ میں لکھی گئی ہیں جو کہ سنت طریقہ ہے جبکہ ترجمہ سرخ رنگ اور رموزاوقاف سبز رنگ میں لکھے گئے ہیں۔
امتیاز حیدر نورانی کا کہنا ہے کہ ترجمے کے ساتھ کسی بھی زبان میں قرآن مجید کا ہاتھ سے لکھا گیا اتنا بڑا نسخہ دنیا میں موجود نہیں ہے۔
وہ اس سے پہلے بھی قرآن پاک کا ایک نسخہ ہاتھ سے لکھ چکے ہیں جس کی چوڑائی 27 انچ اور لمبائی ایک ہزار 4 میٹر ہے اور یہ ہاتھ سے لکھا ہوا دنیا کا سب سے طویل قرآن پاک ہے جس کے بعد مصر، انڈیا اور چین میں لکھے گئے طویل ترین قرآن پاک آتے ہیں۔
‘قران پاک کے اندر نیکی میں سبقت لے جانے کا حکم ہے، ہم نے اس کو دیکھتے ہوئے دنیا کا سب سے طویل ترین قرآن پاک تحریر کیا۔ اس کے بعد ایک اور قرآن پا ک میں نے لکھا تھا۔ اس کا 50 فٹ لمبا صفحہ تھا،53 انچ چوڑائی میں 10صفحات تھے۔ ‘
امتیاز حیدر نورانی کا کہنا تھا کہ نیکی بزرگان دین کے طفیل ہوتی ہے اور انہیں اس طرف ان کے استاد سید طاہر حسنین شاہ صاحب نے راغب کیا تھا۔ انہوں نے پہلے مجھے فقہ کی تعلیم دی، قرآن پاک پڑھایا اور کتابت کا شوق پیدا کیا۔ اس کے بعد انہوں نے مجھے قران پاک لکھنے کے ادب آداب سکھائے۔
ان کا کہنا تھا کہ پنجاب کے گورنر چوہدری سرور نے ایک ہزارچالیس میٹر طویل قرآن کو لاہور گورنر ہاؤس میں زیارت کے لیے منگوایا تھا۔
خیبر پختوانخوا کے گورنر کی طرف سے بھی انہیں تعریفی سند سے نوازا جا چکا ہے جبکہ بلوچستان کے گورنر نے شہدائے بلوچستان کے ایصال ثواب کے لیے اس قرآنی نسخے کو گورنر ہاؤس میں زیارت کے لیے رکھا تھا۔
امتیاز حیدر نورانی نے صدر، وزیر اعظم اور وزیر اعلی سے درخواست کی کہ وہ وقت دیں تاکہ انہیں قران پاک کا یہ نسخہ دکھا یا جائے، اس موقع پر گنیز بک آف ورلڈ ریکارڈ والوں کو بلائیں اور یہ نسخہ ان کے ریکارڈ میں شامل کروائیں۔ ‘
انہوں نے بتایا کہ اب وہ احادیث کی ہاتھ سے لکھی ہوئی دنیا کی سب سے بڑی کتاب مرتب کرنے پر کام کر رہے ہیں۔ انشااللہ تعالی وہ وقت بھی آئے گا جب دنیا میں سب سے بڑی کتاب حدیث پا ک کی ہو گی اور جلد اس کو مرتب کر کے اقوام عالم اور مسلمانوں کے سامنے پیش کر دیں گے۔ ‘
