وزیراعلیٰ خیبر پختونخوا علی امین گنڈاپور نے اعلان کیا ہے کہ اگر وفاقی حکومت نے این ایف سی ایوارڈ کے تحت صوبے کے فنڈز جاری نہیں کیے تو اسے رمضان المبارک کے بعد سرپرائز دیا جائے گا اور اگر ہم پر گولی چلائی گئی تو اس کو چلانے والے ذمیے دار ہوں گے۔
اسلام آباد میں تقریب سے خطاب کرتے ہوئے علی امین گنڈاپور نے کہا کہ ریاست اور عوام کے درمیان تعلق آئین ہوتا ہے لیکن اس پر عملدرآمد نہ کر کے ملک کو توڑا گیا اور ہم نے اس سے کوئی سبق بھی نہیں سیکھا۔
یہ بھی پڑھیں: عمران خان میرے سیاسی رول ماڈل، عظیم انسان بننے کے لیے انسانیت کا خیال رکھنا ضروری ہے، علی امین گنڈاپور
وزیراعلیٰ خیبرپختونخوا نے کہا کہ فاٹا کے انضمام سے صوبے کی آبادی 57 لاکھ بڑھ گئی جبکہ یہ علاقہ پہلے ہی بہت پسماندہ ہے اور اس کو ملک کے باقی علاقوں کے برابر لانے کے لیے مزید وسائل چاہییں۔
علی امین گنڈاپور نے کہا کہ فاٹا میں پسماندگی اور غربت بہت زیادہ ہے لیکن پھر بھی وفاقی حکومت نے فاٹا کے لیے سال 2019 تا سال 2024 تک درکار فنڈز کا صرف 20 فیصد فراہم کیا جبکہ ہمارا آبادی اور رقبے کی بنیاد پر حصہ بڑھ گیا ہے اور ان علاقوں کی پسماندگی ختم کرنے کے لیے 6 سالوں میں سالانہ 100 ارب کے حساب سے 600 ارب روپے ملنےچاہییں تھے۔
یہ بھی پڑھیں: ملکی مسائل اسلامی تعلیمات سے دوری کا نتیجہ ہیں، علی امین گنڈاپور
انہوں نے کہا کہ ہمیں صرف 132 ارب روپے ملے جبکہ رواں مالی سال میں جولائی سے ہمیں فاٹا کے لیے کوئی فنڈز نہیں مل رہے جس کی وجہ سے صوبائی حکومت کو یہ اخراجات برداشت کرنے پڑرہے ہیں۔
’حکومت کو رمضان تک رعایت دے رہا ہوں اور اس کے بعد سرپرائز دوں گا‘
علی امین گنڈاپور نے کہا کہ نئے این ایف سی کی جگہ بار بار آرڈیننس کیا جاتا ہے جبکہ ایپکس کمیٹی کے اجلاس میں ہم نے نئے این ایف سی کا مطالبہ کیا ہے۔ انہوں نے کہا کہ ہمیں حقوق چاہییں آرڈیننس نہیں لہٰذا ہمارا مطالبہ ہے کہ این ایف سی ایوارڈ کے لیے مشاورت شروع کی جائے۔
یہ بھی پڑھیں: صوابی جلسے کے لیے وزیراعلیٰ علی امین گنڈاپور نے پی ٹی آئی کو کتنے لاکھ کے فنڈز دیے؟
وزیر اعلیٰ کے پی نے کہا کہ رمضان المبارک کی رعایت دے رہا ہوں، اس کے بعد ہم آپ کو سرپرائز دیں گے، پن بجلی کے خالص منافع کے 2 ہزار ارب روپے ادا کرنا ہوں گے، صوبے کے حقوق کے لیے آخری حد تک جائیں گے، اگر ہمارے حق کے لیے گولی چلائی گئی تو وہی ذمہ دار ہوں گے جو گولی چلائیں گے۔
