لاہور میں پولیس وردی میں ملبوس ملزمان نے ایک ڈاکٹرکا ’شارٹ ٹرم اغوا‘ کرکے ان کی بینک میں موجود بھاری رقم نکلوالی۔
ماڈل ٹاؤن میں پولیس یونیفارم میں ملبوس 3 ملزمان نے مختار حسین نامی ڈاکٹر کو ان کے گھر سے اغوا کیا اور پھر انہیں سڑکوں پر گھمانے کے دوران بینک سے رقوم نکلواتے رہے۔
یہ بھی پڑھیں: کراچی، پولیس وردی میں ملبوس افراد نے شہری کو اغوا کرکے تاوان وصول کرلیا
ڈاکٹر مختار حسین کی جانب سے لاہور کے ماڈل ٹاؤن تھانے میں درج کروائی گئی ایف آئی آر میں کہا گیا ہے کہ پولیس وردی میں ملبوس 3 ملزم انہیں گھر سے زبردستی ساتھ لے گئے، ملزمان نے گھر سے 3 موبائل بھی اٹھائے اور مجھے رنگ روڈ سمیت مختلف جگہوں پر گھماتے رہے۔
ایف آئی آر میں کہا گیا کہ ملزمان نے پرس اور اے ٹی ایم سے 5 لاکھ روپے زبردستی نکلوائے اور پولیس کو مطلع کرنے کی صورت میں سنگین نتائج کی دھمکیاں دیتے رہے۔ تینوں ملزمان نے واردات کے دوران اپنے چہرے ڈھانپے ہوئے تھے۔
یہ بھی پڑھیں: گلگت میں غیرمتوقع واقعہ رونما، پولیس کے خلاف سیاحوں کو لوٹنے کی شکایت درج
ڈاکٹر مختار حسین کے مطابق ملزمان انہیں اپنے قبضے میں رکھ کر لوٹ مار کرتے رہے اور پھر فیروز پور روڈ پر چھوڑ کر فرار ہوگئے۔
پولیس نے شہری کے بیان پر 3 نامعلوم ملزمان کے خلاف مقدمہ درج کرتے ہوئے ملزمان کی گرفتاری کے لیے کارروائی شروع کردی ہے۔
