فوجی عدالتوں میں سویلینز کا ٹرائل: لارجر بینچ پہلے فیصلے کا پابند نہیں ہوتا، جسٹس امین الدین خان کے ریمارکس

فوجی عدالتوں میں سویلینز کے ٹرائل کے فیصلے کیخلاف انٹراکورٹ اپیلوں پر جسٹس امین الدین خان کی سربراہی میں سپریم کورٹ کے 7 رکنی بینچ نے سماعت کی۔

سول سوسائٹی کے وکیل فیصل صدیقی نے اپنے دلائل کا آغاز کرتے ہوئے کہا کہ فوجی عدالتوں کیخلاف 5 رکنی بینچ کے ایک نہیں بلکہ 3 فیصلے ہیں، جسٹس عائشہ ملک، جسٹس منیب اختر اور جسٹس یحییٰ آفریدی نے اپنے فیصلے لکھے لیکن تمام ججز نے ایک دوسرے کے فیصلے سے اتفاق کیا۔

یہ بھی پڑھیں: سویلینز کا فوجی عدالتوں میں ٹرائل، تحریری حکمنامے میں کیا کہا گیا ہے؟

فیصل صدیقی کے مطابق ججز کے فیصلے یکساں اور وجوہات مختلف ہوں تو تمام وجوہات فیصلہ کا حصہ تصور ہوتی ہیں، جس پر جسٹس محمد علی مظہر کا کہنا تھا کہ ججز نے اضافی نوٹ نہیں بلکہ فیصلے لکھے تھے، جسٹس جمال مندوخیل بولے؛ تمام 5 ججز متفق تھے کہ سویلینز کا ملٹری ٹرائل نہیں ہو سکتا۔

وکیل فیصل صدیقی کا کہنا تھا کہ عمران خان کے وکیل عزیر بھنڈاری نے انٹراکورٹ اپیل کا دائرہ اختیار محدود ہونے کا موقف اپنایا جس سے وہ اتفاق نہیں کرتے، عزیر بھنڈاری کا انحصار پریکٹس اینڈ پروسیجر کیس میں جسٹس منصور علی شاہ کے نوٹ پر تھا۔

جسٹس محمد علی مظہر بولے؛ جسٹس منصور نے ماضی سے اپیل کا حق درست قرار دیا تھا میں نے اختلاف کیا، ماضی سے اپیل کا حق مل جاتا تو 1973 سے اپیلیں آنا شروع ہو جاتیں، فیصل صدیقی نے اتفاق کرتے ہوئے کہا کہ اپیل کا دائرہ محدود کردیا تو ہماری کئی اپیلیں بھی خارج ہوجائیں گی۔

جسٹس امین الدین خان نے ریمارکس دیے کہ نظرثانی فیصلہ دینے والا جب کہ انٹرا کورٹ اپیل لارجر بینچ سنتا ہے، لارجر بینچ مقدمہ پہلی بار سن رہا ہوتا ہے اس لیے پہلے فیصلے کا پابند نہیں ہوتا۔

فیصل صدیقی نے سپریم کورٹ کی آئینی بینچ پر اپنے مکمل اعتماد کا اظہار کیا، جسٹس جمال مندوخیل بولے؛ اگر آپ اسی طرح دلائل دیتے رہے تو لگتا ہے آپ کو 3 ماہ تک سننا پڑے گا،

آئینی بینچ آرمی ایکٹ کی شقوں کو کالعدم قرار دیے بغیر بھی سویلین کا ٹرائل کالعدم قرار دے سکتا ہے، جسٹس جمال مندوخیل بولے؛ اگر آپ اسی طرح دلائل دیتے رہے تو لگتا ہے آپکو تین ماہ تک سننا پڑے گا۔

فیصل صدیقی آئینی بینچ آرمی ایکٹ کی شقوں کو کالعدم قرار دیے بغیر بھی سویلین کا ٹرائل کالعدم قرار دے سکتا ہے، سیکشن 94 کے تحت کمانڈنگ افسر کو ملزمان کی حوالگی کا صوابدیدی اختیار درست نہیں۔

جسٹس نعیم افغان کا کہنا تھا کہ پہلے دن سے پوچھ رہا ہوں کہ انسداد دہشت گردی عدالت کے جج کا ملزم حوالے کرنے کا کوئی باضابطہ حکم نامہ ہے، جس پر فیصل صدیقی نے بتایا کہ حکم نامہ تو ہے لیکن اس میں وجوہات نہیں بیان کی گئی ہیں۔

جسٹس جمال مندوخیل نے ریمارکس دیے کہ کیا عدالت کو خود دیکھنا ہوتا ہے کہ اسے اختیار سماعت ہے یا نہیں، کیا لازمی ہے کہ کوئی فریق ہی دائرہ اختیار کا اعتراض کرے، جسٹس امین الدین بولے؛ عدالت کو خود اپنا دائرہ اختیار طے کرنا ہوتا ہے۔

فیصل صدیقی کا کہنا تھا کہ اگر کوئی مزار قائد کا قبضہ مانگ لے تو کیا عدالت یہ کہے گی کہ کسی نے دائرہ اختیار پر اعتراض نہیں کیا، لوگ یہ سمجھتے ہیں ہماری عدالتی تاریخ سیاہ ہے لیکن ہماری عدالتی تاریخ بہت خوبصورت ہے،کئی مواقع پر ہمارے ججز نے عوام کے حقوق کا دفاع کیا ہے۔

فیصل صدیقی کے مطابق 1980 میں ضیا الحق وقت کا فرعون تھا، چار سے پانچ ججز کھڑے ہوئے، کتنے لوگوں کی زندگیاں بچائی، ایف بی علی کیس میں سپریم کورٹ نے بہت ریلیف دیا ہے، ایف بی علی پر 2 چارجز تھے ایک چارج سازش کا بھی تھا۔

فیصل صدیقی سے مکالمہ کرتے ہوئے جسٹس مسرت ہلالی نے ریمارکس دیتے ہوئے کہا کہ بلوچستان میں ایک دفعہ حالات خراب تھے، ہمیں رات کو بھی عدالت میں رکنا پڑا، امید ہے آپ نے کبھی ایسے حالات نہیں دیکھے ہوں گے۔

فیصل صدیقی کا موقف تھا کہ سویلین کو فوجی تحویل میں دینے کا فیصلہ درست نہیں تھا، حوالگی فرد جرم عائد ہونے کے بعد ہی دی جاسکتی ہے، جسٹس محمد علی مظہر بولے؛ ایف آئی آر درج ہونے کے بعد ضمانت کی درخواست دینے والے کو ملزم ہی کہا جاتا ہے، جو فردجرم عائد ہونے سے قبل بھی ملزم ہی ہوتا ہے، مجرم نہیں بن جاتا۔

فیصل صدیقی کے مطابق فرد جرم عائد ہونے کے بعد ہی تعین ہوتا ہے جرم کی نوعیت آفیشل سیکرٹ ایکٹ سے متعلقہ ہے، دیوان موٹرز کیس کے فیصلے میں آئینی بینچ نے اصول طے کیا تھا کہ اگر بنیاد غلط ہو تو ڈھانچہ برقرار نہیں رہ سکتا۔

جسٹس نعیم اختر افغان کا کہنا تھا کہ آپ نے کہا تھا کہ قانون کالعدم کیے بغیر بھی سویلنز کا ٹرائل کالعدم ہوسکتا ہے، انسداد دہشتگردی قانون کے شیڈیول میں آفیشل سیکریٹ ایکٹ شامل نہیں ہے۔

جسٹس امین الدین خان کا کہنا تھا کہ کیا فوجی عدالتوں میں ان دفعات پر ٹرائل ہوا جو اے ٹی سی کے زمرے میں آتی ہیں، جس پر فیصل صدیقی بولے؛ میرے خیال میں فوجی عدالتوں سے سزائیں آفیشل سیکرٹ ایکٹ کے تحت ہوئی ہیں۔

جسٹس جمال مندوخیل کا کہنا تھا کہ ایسے تو آرمڈ آرڈیننس بھی انسداد دہشتگردی قانون کے شیڈول میں نہیں ہے، قتل کےساتھ دفعات آرمڈ آرڈیننس کی لگی ہوں تو انسداد دہشت گردی عدالت ہی ٹرائل کرتی ہے۔

جسٹس محمد علی مظہر نے ریمارکس دیے کہ جن کا ٹرائل فوجی عدالت میں ہوچکا ان کا دوبارہ ٹڑائل ممکن نہیں، ایسا نہیں ہوسکتا کہ آفیشل سیکریٹ ایکٹ میں فوجی عدالت سزا دے کر انسداد دہشت گردی عدالت کو کیس بھیج دے۔

جسٹس جمال مندوخیل کا کہنا تھا کہ آرمی ایکٹ میں تو ایف آئی آر کا تصور ہی نہیں ہے، وکیل فیصل صدیقی نے بتایا کہ ملزمان کی حوالگی کے لیے مجسٹریٹ جائزہ لے کر کیس انسداد دہشتگردی عدالت کو بھیجتا ہے۔

جسٹس امین الدین کا موقف تھا کہ اگر درخواست براہ راست آ جائے تو انسداد دہشت گردی عدالت کے جج کو فیصلے میں وجوہات دینی چاہیے، جسٹس امین الدین خان نے استفسار کیا کہ ملزم کی حوالگی ہو جائے تو اس کے پاس کیا قانونی آپشن ہوتے ہیں۔

فیصل صدیقی کے مطابق ملزم کی حوالگی کے وقت عدالت کو تسلی ہونی چاہیے کہ فوجی عدالت کا جرم بنتا ہے یا نہیں، صرف ایف آئی آر کی بنیاد پر کسی کا کورٹ مارشل نہیں ہوسکتا۔

جسٹس جمال مندوخیل کا کہنا تھا کہ ملزم کو تفتیشی افسر کے حوالے بھی مجسٹریٹ ہی کرسکتا ہے، کیا تفتیشی افسر ملزم کو کسی اور کے حوالے کرسکتا ہے، جس پر فیصل صدیقی کا موقف تھا کہ تفتیشی افسر کو اختیار نہیں کہ اپنے طور پر ملزم کسی اور کے حوالے کر سکے۔

ملٹری کورٹس میں سویلینز کے ٹراتل سے متعلق کیس کی سماعت کل تک ملتوی کردی گئی، سول سوسائٹی کے وکیل فیصل صدیقی کل بھی دلائل جاری رکھیں گے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں