کاؤنٹر ٹیررازم ڈیپارٹمنٹ (سی ٹی ڈی) نے کالعدم تنظیم کی ویڈیو بنا کر ساتھی کی مدد سے سوشل میڈیا پر وائرل کرنے والے ملزم کو گرفتار کرلیا ہے۔
سی ٹی ڈی کی جانب سے جاری پریس ریلیز میں کہا گیا ہے کہ چند روز قبل سوشل میڈیا پر ایک ویڈیو وائرل ہوئی تھی جس میں کالعدم تحریک طالبان نور ولی محسود گروپ کا تذکرہ تھا۔ مذکورہ ویڈیو کے وائرل ہونے کے بعد سی ٹی ڈی کراچی نے تحقیقات کا آغاز کیا، تحقیقات کے دوران ہر دو پہلوؤں سے ویڈیو کی جانچ کی گئی۔
یہ بھی پڑھیں: کرک: سی ٹی ڈی اور پولیس کا مشترکہ آپریشن، 5 دہشتگرد مارے گئے
سی ٹی ڈی کا کہنا ہے کہ ویڈیو کالعدم تحریک طالبان پاکستان نورولی محسود گروپ کی طرف سے سوشل میڈیا پر وائرل کی گئی جس کا مقصد کراچی میں ایک دفعہ پھر کالعدم تنظیم کی دہشت پھیلانا مقصود تھا۔
سی ٹی ڈی کراچی نے آج کاروائی کرتے ہوئے ملزم محمد عمر ولد عزیز الرحیم کو مسان چوک نزد کے پی ٹی فٹبال گراؤنڈ و حقانی مسجد کیماڑی کراچی سے گرفتار کیا، ملزم نے دوران انٹروگیشن انکشاف کیا کہ اس نے یہ ویڈیو اپنے موبائل فون سے بنا کر اپنے تنظیمی ساتھی قہرمان کو ترسیل کی تھی۔
یہ بھی پڑھیں: کراچی: چینی شہریوں پر فائرنگ کے واقعہ میں کالعدم تنظیم کے ملوث ہونے کا انکشاف
ملزم کی نشاندہی پر سوشل میڈیا پر وائرل ہونے والی پرچی بھی برآمد کرلی گئی ہے،ملزم کے انکشافات کی روشنی میں مزید کارروائی جاری ہے۔
ملزم کے خلاف تھانہ سی ٹی ڈی سندھ کراچی میں دہشتگردی کی دفعات کے تحت مقدمہ درج کیا گیا ہے، ملزم کے دیگر ساتھیوں کی گرفتاری اور مزید دہشتگردی مواد کی برآمدگی کے سلسلے میں پولیس اور سی ٹی ڈی مشترکہ کارروائیاں کررہی ہیں۔
