پاکستان کرکٹ ٹیم نے نیوزی لینڈ کو تیسرے ٹی20 میں شکست دے کر ورلڈ ریکارڈ اپنے نام کرلیا۔
پاکستان اور نیوزی لینڈ کے درمیان آج کا میچ نیوزی لینڈ کے شہر آکلینڈ میں کھیلا گیا، جہاں گرین شرٹس نے میزبان کو 9 وکٹوں سے ہرایا۔
یہ بھی پڑھیں نیوزی لینڈ کے خلاف تیسرے ٹی20 میچ میں پاکستان نے کونسے نئے ریکارڈ اپنے نام کیے؟
آج کی جیت کے بعد پاکستان ٹی20 فارمیٹ میں کم سے کم اوورز میں 200 سے زیادہ رنز کا ہدف حاصل کرنے والی ٹیم بن گئی ہے۔
آج کے میچ میں نیوزی لینڈ نے پہلے بیٹنگ کرتے ہوئے پاکستان کو جیت کے لیے 205 رنز کا ہدف دیا تھا، جو قومی ٹیم نے 16 اوورز میں حاصل کرلیا۔
پاکستانی بلے بازوں نے کیوی بولرز کی ایک نہ چلنے دی، قومی ٹیم کے بلے باز حسن نواز نے 105 جبکہ سلمان علی آغا نے 51 رنز اسکور کیے۔
میچ میں سینچری اسکور کرنے والے حسن نواز نے کہاکہ پہلے دو میچوں میں صفر پر آؤٹ ہونے کے باوجود ٹیم مینجمنٹ نے بہت سپورٹ کیا، بیٹنگ کے دوران مجھ پر کوئی دباؤ نہیں تھا۔
یہ بھی پڑھیں پاکستان کی طرف سے ٹی20 کرکٹ میں تیز ترین سینچری کرنے والے حسن نواز کون ہیں؟
حسن نواز نے صرف 44 گیندوں پر سینچری اسکور کی اور سابق کپتان بابر اعظم کا ریکارڈ توڑ دیا، بابر اعظم نے 2021 میں جنوبی افریقہ کے خلاف 49 گیندوں پر سینچری اسکور کی تھی۔
