نیوزی لینڈ نے پاکستان کو سیریز کے تیسرے اور آخری ون ڈے میچ میں شکست دیکر کلین سوئپ کردیا۔ ماؤنٹ مونگانوئی میں کھیلا گیا میچ خراب موسم کے باعث تاخیر کا شکار ہوا، پھر میچ کی دونوں اننگز کو 42، 42 اوورز تک محدود کردیا گیا تھا، محمد رضوان نے ٹاس جیت کر فیلڈنگ کا فیصلہ کیا۔ کیوی ٹیم نے پہلے بیٹنگ کرتے ہوئے 42 اوورز میں 8 وکٹوں کے نقصان پر 264 رنز بنائے۔
کپتان مائیکل بریسویل 59 رنز بناکر ٹاپ اسکورر رہے۔ ڈیرل مچل 43 اور ہینری نکلز نے 31 رنز بنائے۔ پاکستان کی جانب سے عاکف جاوید نے 4، نسیم شاہ نے 2 جبکہ فہیم اشرف اور سفیان مقیم نے ایک ایک وکٹ حاصل کی۔
مزید پڑھیں: پہلا ون ڈے: نیوزی لینڈ نے پاکستان کو 73 رنز سے شکست دیدی
ہدف کے تعاقب میں پاکستان ٹیم 40 اوورز میں 221 رنز بنا کر آؤٹ ہوگئی۔ اوپنر امام الحق اور عبداللہ شفیق نے اننگز کا آغاز کیا تو امام گیند لگنے کے باعث ریٹائر ہرڈ ہوگئے، اوپنر عبداللہ شفیق 33 رنز بناکر آؤٹ ہوئے۔ بابر اعظم نے 50 رنز کی اننگز کھیلی۔
دیگر کھلاڑیوں میں سلمان آغا 11، عثمان خان 12، کپتان محمد رضوان 37، طبیب طاہر 33، نسیم شاہ 17، فہیم اشرف 3، محمد وسیم جونئیر صفر پر پویلین لوٹے۔ نیوزی لینڈ کی جانب سے بین سیئرز نے 5، جیکب ڈفی 2 جبکہ محمد عباس اور ڈیرل مچل نے ایک ایک وکٹ حاصل کی۔
مزید پڑھیں: نیوزی لینڈ نے پاکستان کو دوسرے ون ڈے میں 84 رنز سے شکست دے کر سیریز اپنے نام کرلی
پاکستان نے آج حارث رؤف کی جگہ نسیم شاہ کو اسکواڈ کا حصہ بنایا تھا۔
