چیف الیکشن کمشنر آزاد جموں و کشمیر جسٹس (ر) غلام مصطفیٰ مغل نے کشمیر میں عام انتخابات کو صاف، شفاف، آزاد اور غیر جانبدار بنانے کے لیے جدید انفارمیشن ٹیکنالوجی کے مؤثر استعمال کو وقت کی اہم ضرورت قرار دیا ہے۔
چیف الیکشن کمشنر کی زیر صدارت آزاد جموں و کشمیر کے عام انتخابات 2026 کے لیے آئی ٹی بورڈ کے تعاون سے تیار کیے جانے والے رزلٹ مینجمنٹ سسٹم یعنی آر ایم ایس کے حوالے سےمنعقدہ ایک اہم اجلاس میں انتخابی نتائج کی بروقت اور شفاف ترسیل کے لیے اٹھائے گئے انتظامات کا جائزہ لیا گیا۔
یہ بھی پڑھیں: آزاد کشمیر انتخابات: بیلٹ پیپرز کی چھپائی کا جائزہ، بروقت تکمیل کی ہدایت
اجلاس سے خطاب کرتے ہوئے جسٹس (ر) غلام مصطفیٰ مغل نے کہا کہ الیکشن کمیشن تمام متعلقہ محکموں کے تعاون سے انتخابی انتظامات کو بروقت مکمل کرنے کے لیے مربوط حکمت عملی پر عمل پیرا ہے تاکہ انتخابات کا انعقاد اعلیٰ انتظامی معیار اور مکمل شفافیت کے ساتھ یقینی بنایا جا سکے۔
اجلاس کے دوران چیف الیکشن کمشنر کو بریفنگ دیتے ہوئے بتایا گیا کہ الیکشن کمیشن کے تعاون سے جدید رزلٹ مینجمنٹ سسٹم کے ذریعے عام انتخابات 2026 کے نتائج کو منظم، محفوظ اور بروقت انداز میں مرتب کیا جائے گا۔ اس نظام کے تحت انتخابی نتائج کو حلقہ وار اور پولنگ اسٹیشن وار بھی دیکھا جا سکے گا، جس سے نتائج تک فوری اور آسان رسائی ممکن ہوگی۔
مزید پڑھیں: آزاد کشمیر انتخابات 2026: امیدواروں کی حتمی فہرست جاری، 45 حلقوں میں 852 امیدوار مدمقابل
اجلاس میں سینیئر رکن الیکشن کمیشن خواجہ محمد احسن، رکن الیکشن کمیشن سید نظیر الحسن گیلانی، سیکرٹری الیکشن کمیشن راجہ محمد شکیل خان، سیکریٹری اطلاعات و انفارمیشن ٹیکنالوجی محمد راشد حنیف، ناظم تعلقات عامہ طارق جمیل درانی، ڈپٹی سیکریٹری اطلاعات و آئی ٹی ملک حامد صدیق سمیت دیگر متعلقہ حکام نے شرکت کی۔
بریفنگ میں بتایا گیا کہ جدید رزلٹ مینجمنٹ سسٹم کا بنیادی مقصد انتخابی عمل میں شفافیت، درستگی اور عوامی اعتماد کو مزید مستحکم بنانا ہے، جبکہ جدید ٹیکنالوجی کے ذریعے نتائج کی ترسیل کو زیادہ مؤثر اور قابل اعتماد بنایا جائے گا۔
