نگران وزیر اعلیٰ پنجاب محسن نقوی کو عہدے سے ہٹانے کے لیے لاہور ہائیکورٹ میں درخواست دائر کردی گئی۔
پنجاب کے نگران وزیر اعلیٰ محسن نقوی کے عہدے کی معیاد مکمل ہونے پر، انہیں عہدے سے ہٹانے کے لیے لاہور ہائیکورٹ میں درخواست دائر کردی گئی۔
درخواست شہری لطیف چوہدری کی جانب سے دائر کی گئی۔ درخواست میں نگران وزیراعلیٰ محسن نقوی، الیکشن کمیشن سمیت دیگر کو فریق بنایا گیا۔
درخواست گزار نے موقف اختیار کیا ہے کہ پنجاب میں نگران حکومت کی آئین میں دی گئی معیاد ختم ہو چکی ہے، سپریم کورٹ نے الیکشن کی تاریخ میں توسیع کی لیکن نگران حکومت کو توسیع نہیں دی. نگران وزیراعلیٰ پنجاب محسن نقوی غیر آئینی طور پر عہدہ سنبھالے ہوئے ہیں. نگران وزیر اعلیٰ اور کابینہ کا عہدے پر برقرار رہنا آئین کی کھلی خلاف ورزی ہے. 90 روز گزرنے کے بعد نگران حکومت کے تمام احکامات اور اقدامات غیر آئینی ہیں۔
درخواست میں استدعا کی گئی ہے کہ عدالت نگران وزیر اعلیٰ محسن نقوی کو فوری عہدے سے ہٹانے، نگران حکومت پنجاب کو کام سے روکنے اور الیکشن کمیشن کو پنجاب میں نئی نگران حکومت کا نوٹیفکیشن جاری کرنے کا حکم دے۔