سابق وزیراعلیٰ پنجاب چوہدری پرویز الہیٰ کے خلاف اینٹی کرپشن گوجرانوالہ نے سورس رپورٹ پر اپنی مدعیت میں مقدمہ درج کیا ہے۔ ایف آئی آر میں ترقیاتی اسکیم کے ٹھیکے کی مد میں 2 ارب روپے رشوت لینے کا الزام ہے۔
ایف آئی آر کے مطابق مقدمہ میں پہلے سے گرفتار ملزم سہیل اصغر چوہدری بھی ملزم نامزد ہے۔ جبکہ ایکسین، ایس ڈی او ہائی وے گجرات، ٹھیکہ لینے والی کمپنی کے مالک حاجی طارق بھی ملزم نامزد ہیں۔
ایف آئی آر میں کہا گیا ہے کہ 10 ارب روپے کی لاگت سے گجرات میں پرانا جی ٹی روڈ کی تعمیر کی گئی۔ ٹھیکہ حاجی طارق کی کنسٹرکشن کمپنی کو دیا گیا۔ چوہدری پرویز الہیٰ نے اختیارات کا ناجائز استعمال کرتے ہوئے 2 ارب روپے لیکر ٹھیکہ دلوایا۔ اس ڈیل میں چوہدری پرویزالہیٰ کا فرنٹ مین سہیل اصغر چوہدری بھی برابر کا شریک ہے۔
