وزیراطلاعات سندھ شرجیل میمن نے کہا ہے کہ وہ وقت دور نہیں جب پیپلزپارٹی لاہور کا قلعہ دوبارہ فتح کرے گی۔ میں اپنی پارٹی قیادت سے درخواست کروں گا کہ ایک ٹکٹ مجھے لاہور سے دے دیں۔
لاہور میں ایک تقریب سے خطاب کرتے ہوئے انہوں نے کہا کہ ہمارا مقابلہ نفرت کے بیج بونے والوں اور جھوٹ بولنے والوں سے ہے۔ پیپلزپارٹی کبھی کسی کے سہارے پر اقتدار میں نہیں آئی۔
شرجیل میمن کا کہنا تھا کہ اس وقت ملک کو نقصان پہنچانے کے لیے گھناؤنی سازشیں کی جارہی ہیں۔ ہمارے لیڈر کبھی ملک سے نہیں بھاگے نہ منہ چھپا کر عدالت میں گئے۔
پی پی رہنما نے کہا کہ ہمارے مخالفین کا مقصد اقتدار کے حصول کے لیے ہر حد تک جانا ہے جبکہ پیپلزپارٹی نے ملک کو ایٹمی طاقت بنانے کے علاوہ سی پیک جیسے تحفے دیے۔ اب ہم سب کو آئینہ دکھائیں گے کہ آپ نے کیا کِیا اور ہم نے کیا کِیا۔
شرجیل میمن نے کہا کہ پاکستان کے اداروں پر سوشل میڈیا کے ذریعے خطرناک حملے کیے گئے اور یہ ڈوریاں ملک کے باہر سے ہلائی جا رہی ہیں۔
ان کا کہنا تھا کہ ہمارے قائدین نے ملک کی خاطر جانوں کے نذرانے پیش کیے اور ہمارے مخالفین وہ ہیں جن کا ایجنڈا ملک میں صرف انتشار پھیلانا ہے۔
شرجیل میمن نے کہا کہ ہمارے مخالفین وہ لوگ ہیں جو پاکستان میں صرف انتشار دیکھنا چاہتے ہیں لیکن ہم کسی کو بھی پروپیگنڈے کے ذریعے ملک کو نقصان پہنچانے کی اجازت نہیں دیں گے۔
