لندن میں واقع ہندوستانی ہائی کمیشن کے باہر پاکستان مسلم لیگ (ن) کے برطانیہ چیپٹر کے زیر اہتمام احتجاجی مظاہرہ کیا گیا۔
یہ احتجاج مقبوضہ کشمیر کے پہلگام میں 22 اپریل کو ہونے والے حملے کے بعد پیدا ہونے والی کشیدگی کے تناظر میں کیا گیا جس میں 26 افراد ہلاک ہو گئے تھے۔
یہ بھی پڑھیے: بھارتی انتہا پسندوں کا پاکستانی ہائی کمیشن پر دھاوا ، لندن پولیس حرکت میں آگئی
احتجاج میں مظاہرین نے پاکستان کے پرچم اور پلے کارڈز لہراتے ہوئے جنرل عاصم منیر زندہ باد، پاکستان زندہ باد، کشمیر پاکستان کا ہے اور ہم بھارتی دہشت گردی کی مذمت کرتے ہیں جیسے نعرے لگائے۔
مظاہرین نے ہندوستان کے وزیر اعظم نریندر مودی اور ہندوتوا نظریہ کی بھی مذمت کرتے ہوئے مودی دہشت گرد ہے اور ہندوتوا نظریہ مردہ باد کے نعرے بلند کیے۔
مسلم لیگ (ن) برطانیہ کے صدر احسن ڈار نے مظاہرین سے خطاب کرتے ہوئے کہا کہ یہ بڑا مظاہرہ بیرون ملک مقیم پاکستانیوں کے اپنی مادر وطن کے لیے جذبات کا عکاس ہے۔ آج برطانیہ بھر سے پاکستانی پاکستان کی سیاسی اور فوجی قیادت کے لیے اپنی حمایت کا اظہار کرنے کے لیے بھارتی ہائی کمیشن کے باہر جمع ہوئے ہیں۔
یہ بھی پڑھیے: لندن: پاکستان ہائی کمیشن کا رخ کرنے پر 4 بھارتی انتہا پسند گرفتار، برٹش پاکستانیوں کا بھارت کو منہ توڑ جواب
انہوں نے کہا کہ پہلگام واقعہ پاکستان کو بدنام کرنے کے لیے سجایا گیا ایک فالس فلیگ آپریشن تھا جس کے بعد بھارت نے بغیر کسی ثبوت کے الزام پاکستان پر ڈال دیا۔
