بالی ووڈ کے معروف اداکار نواز الدین صدیقی نے بالی ووڈ کی موجودہ صورتحال پر تشویش کا اظہار کرتے ہوئے اسے چور قرار دے دیا۔
نواز الدین صدیقی نے حال ہی میں ایک انٹرویو میں مختلف موضوعات پر بات کی اور خاص طور پر بالی ووڈ کو تنقید کا نشانہ بنایا۔ ان کا کہنا تھا کہ ’ہماری انڈسٹری میں ایک ہی چیز کو 5 سال تک دہرایا جاتا ہے پھر جب لوگ اس سے بور ہو جاتے ہیں تو اسے چھوڑ دیا جاتا ہے‘۔
ان کا مزید کہنا تھا کہ ’دراصل عدم تحفظ بہت بڑھ گیا ہے اور بالی ووڈ کو لگتا ہے کہ اگر کوئی فارمولا چل رہا ہے تو اسے ہی چلاتے رہو، اسے رگڑتے رہو۔ اور اس سے بھی زیادہ افسوسناک بات یہ ہے کہ اب 2، 3، 4 (سیکوئلز) بننے لگ گئے ہیں۔ جیسے مالی دیوالیہ پن ہوتا ہے، ویسے ہی یہ تخلیقی دیوالیہ پن ہوگیا ہے۔ بہت زیادہ کنگالی ہے۔ شروع سے ہماری انڈسٹری چوری کرتی آ رہی ہے۔ ہم نے گانے چرائے، کہانیاں چرائیں‘۔
یہ بھی پڑھیں: نواز الدین صدیقی نے خود کو بالی ووڈ کا ’بدصورت ترین‘ اداکار کیوں قرار دیا؟
بالی ووڈ اداکار کا تنقید کرتے ہوئے مزید کہنا تھا کہ ’چور کہاں سے تخلیقی ہو سکتے ہیں؟ ہم نے ساؤتھ سے چرایا، کبھی یہاں سے، کبھی وہاں سے۔ حتیٰ کہ کچھ کلٹ فلمز جو ہٹ ہوئیں، ان کے سینز بھی چرائے گئے۔ اس چوری کو اتنا نارملائز کر دیا گیا ہے کہ اب لوگ کہتے ہیں کہ چوری ہے تو کیا ہوا؟ پہلے تو ویڈیو پکڑا دیتے تھے اور کہتے تھے ہمیں یہی فلم بنانی ہے۔ وہ ویڈیو دیکھتے تھے اور یہاں ویسا ہی بنا دیتے تھے۔ ایسی انڈسٹری سے آپ کیا توقع کر سکتے ہیں؟ کیسے اداکار آئیں گے؟ وہ بھی ویسے ہی ہوں گے۔ پھر ہدایت کار اور اداکار انڈسٹری چھوڑنے لگتے ہیں جیسے کے انوراگ کشیپ، جو اچھا کام لا رہے تھے‘۔
واضح رہے کہ نوازالدین صدیقی اپنی نئی فلم ’کوسٹاؤ‘ میں نظر آئیں گے جس کا ٹیزر آتے ہی چھا گیا۔ نوازالدین صدیقی نئی فلم کوسٹاؤ میں پولیس کے کردار میں دکھائی دیں گے، جو ایک خطرناک اسمگلر کے خلاف لڑتے دکھائی دے رہا ہے۔
یہ بھی پڑھیں: پاکستانی ڈرامہ نگار اور اداکار دونوں ہی باکمال ہیں، نواز الدین صدیقی
جھڑپ میں پولیس کا کردار نبھانے والا نواز الدین صدیقی اسمگلنگ مافیا کے ایک کارندے کا قتل کردیتا ہے اور سیلف ڈیفنس میں خود بھی زخمی ہوجاتا ہے۔
کوسٹاؤ کے خلاف اگلے کئی سالوں تک کیس چلتے ہیں جہاں ماتحت عدالتیں اسے پھانسی کی سزا بھی سنا دیتی ہیں تاہم کوسٹاؤ ہمت نہیں ہارتا اور اس فیصلے کو اعلیٰ سطح کی عدالتوں میں چیلنج کردیتا ہے اور پھر بالاآخر سپریم کورٹ کے حکم پر اسے بری کردیا جاتا ہے۔
فلم کے پروڈیوسرز میں ونود بھنوشالی، کملیش بھنوشالی، بھاویش منڈالیا، سیجل شاہ، شیام سندر اور فیض الدین صدیقی شامل ہیں۔
