وزیراعظم پاکستان شہباز شریف نے آج نیول ڈاکیارڈ کراچی کا دورہ کیا جہاں انہوں نے آپریشن ’بنیان مرصوص‘ میں پاک بحریہ کے اہم کردار کو سراہا۔
پاک فوج کے شعبہ تعلقات عامہ (آئی ایس پی آر) کے مطابق وزیراعظم کا آمد پر نیول چیف ایڈمرل نوید اشرف نے استقبال کیا، جبکہ اس موقع پر چیف آف آرمی اسٹاف جنرل سید عاصم منیر اور ایئر چیف ظہیر احمد بابر سدھو بھی موجود تھے۔
یہ بھی پڑھیں بھارت کو قیامت تک سبق یاد رہےگا، دوبارہ جارحیت کی تو منہ توڑ جواب دیں گے، وزیراعظم شہباز شریف
آئی ایس پی آر نے بتایا کہ دورے کے دوران وزیراعظم جنگی جہاز پی این ایس تیمور پر سوار ہوئے، جہاں انہیں کمانڈر پاکستان فلیٹ نے بریفنگ دی۔
وزیراعظم نے پاک بحریہ کے افسران اور جوانوں نے بات چیت کرتے ہوئے ان کی مثالی پیشہ ورانہ مہارت، جنگی تیاری اور قومی دفاع کے لیے ثابت قدمی کو سراہا۔
وزیراعظم شہباز شریف نے خطاب کرتے ہوئے پاک بحریہ کے پرعزم انداز، آپریشنل مہارت اور دشمن کے سمندری خطرات کا مقابلہ کرنے کے لیے مؤثر جوابی کارروائی کی تعریف کی۔ انہوں نے سمندری تجارت کو بلاتعطل یقینی بنانے پر بھی پاک بحریہ کے کردار کو سراہا۔
وزیراعظم شہباز شریف نے کہاکہ پاکستان بحریہ کسی بھی خطرے کا جواب دینے کی بھرپور صلاحیت رکھتی ہے۔
یہ بھی پڑھیں پاک بحریہ نے بھارتی طیارے کا سراغ لگا کر مکمل نگرانی میں رکھا
وزیراعظم کے ہمراہ وزیر دفاع خواجہ محمد آصف، وزیر منصوبہ بندی، ترقی اور خصوصی اقدامات احسن اقبال، وزیر اطلاعات و نشریات عطااللہ تارڑ اور وفاقی وزیر تعلیم و پیشہ ورانہ تربیت ڈاکٹر خالد مقبول صدیقی بھی موجود تھے۔
