گھروں میں گاڑیاں گھس آںے والے واقعات تو ہو ہی جاتے ہیں لیکن ناروے میں ایک شخص کے گھر کے باغ میں پورا کا پورا بحری جہاز ہی گھس گیا اور اس سے بھی مزے کی بات یہ ہے کہ اس دوران مالک گہری نیند کے مزے لیتا رہا اور پڑوسیوں کے جگانے پر ہی مشکل سے جاگا۔
یہ بھی پڑھیے: میکسیکن بحری جہاز نیویارک کے تاریخی بروکلین پل سے ٹکرا گیا، 19 افراد زخمی
یہ واقعہ ٹرانڈہیم میں ایک رہائشی جوہن ہیلبرگ کے گھر میں پیش آیا تاہم اس وقت وہ اتنی گہری نیند میں تھے کہ انہیں اپنے باغ میں جہاز گھس آنے کا پتا ہی نہیں چلا۔
135 میٹر لمبا ایک مال بردار جہاز جوہن کے گھر کے سامنے والے گارڈن سے آ ٹکرایا جس سے صرف چند میٹر کے فاصلے پر وہ اپنے کمرے میں سو رہے تھے۔
اتنا بڑا معاملہ ہوگیا لیکن جوہن کی آنکھ نہیں کھلی تاہم انہیں اس کا اس وقت پتا چلا جب ان کا ایک پڑوسی ان کی خیریت دریافت کرنے بھاگا بھاگا ان کے گھر چلا آیا۔
جوہن نے کہا کہ دروازے کی گھنٹی ایسے وقت بجی جس وقت مجھے دروازہ کھولنا سخت ناپسند ہوتا ہے۔
مزید پڑھیے: وہ کون سا شہر ہے جہاں اونچی ہیل پہننے کے لیے پرمٹ لینا پڑتا ہے؟
انہوں نے کہا کہ میں تو دروازہ کھولے بغیر دوبارہ نیند کی آغوش میں چلا جاتا لیکن گھنٹی متواتر بجائی جا رہی تھی اس لیے نہ چاہتے ہوئے بھی مجھے اٹھ کر دروازے پر جانا پڑا۔
جوہن نے کہا کہ وہاں ایک لڑکا کھڑا تھا جس کو میں اچھی طرح جانتا تھا جو مجھے دیکھتے ہی حیرت سے بول پڑا کہ آپ نے وہ جہاز نہیں دیکھا۔ انہوں نے کہا کہ میں نے نفی میں سر ہلاتے ہوئے جب کھڑکی میں جاکر دیکھا تو حیران رہ گیا کہ ایک بحری جہاز میرے گھر میں گھسا ہوا ہے۔
مزید پڑھیں: اپنے پیاروں کا بدلہ لینے کے لیے خاتون نے 40 گینگسٹرز کیسے قتل کیے؟
مقامی پولیس کے راجر گسٹافسن نے بتایا کہ اس واقعے کی تحقیقات شروع کردی گئی ہیں۔ تاہم ان کا کہنا تھا کہ ایسا نہیں لگتا کہ جہاز چلانے والا نشے میں یہ حرکت کر بیٹھا ہوا۔
