محکمہ موسمیات نے ملک کے مختلف علاقوں میں کل (منگل) کے روز آندھی، تیز جھکڑ اور بارش کی پیشگوئی کی ہے جبکہ 6 جون سے ملک بھر میں شدید گرمی کی نئی اور طویل لہر (ہیٹ ویو) کے آغاز کا خدشہ ظاہر کیا گیا ہے۔
مری، گلیات، کشمیر اور گلگت بلتستان کے بالائی علاقوں میں موسم نسبتاً خوشگوار اور ہلکی خنکی لیے ہوئے ہے، تاہم کل دن میں موسم کے اچانک تبدیل ہونے کا امکان ہے، جس کے دوران بعض علاقوں میں آندھی، گرد آلود ہوائیں اور بارش ہو سکتی ہے۔
ادارے نے خبردار کیا ہے کہ 6 جون سے شروع ہونے والی ہیٹ ویو 15 جون تک جاری رہ سکتی ہے۔ اس دوران سندھ اور بلوچستان میں درجہ حرارت 46 سے 50 ڈگری سینٹی گریڈ جبکہ جنوبی پنجاب میں 46 سے 48 ڈگری سینٹی گریڈ تک پہنچ سکتا ہے۔ ہوا میں نمی کے اضافے کے باعث حبس کی شدت بھی بڑھنے کا امکان ہے۔
مزید پڑھیں: مون سون 2025: معمول سے زیادہ بارشیں، سیلاب اور اربن فلڈنگ کا خطرہ، محکمہ موسمیات
محکمہ موسمیات کے مطابق اسلام آباد، خیبرپختونخوا اور بلوچستان کے کئی علاقوں میں گرمی کی شدت بدستور برقرار ہے، جبکہ جنوبی پنجاب اور سندھ کے میدانی اضلاع میں درجہ حرارت مزید بڑھنے کا امکان ہے۔ بعض مقامات پر پارہ 45 سے 48 ڈگری سینٹی گریڈ تک جا سکتا ہے۔
رحیم یار خان، بدین، ٹھٹھہ، نوابشاہ، سکھر، حیدرآباد، بہاولپور اور بہاولنگر سمیت کئی اضلاع شدید گرمی کی لپیٹ میں ہیں۔ جبکہ لاہور، فیصل آباد، سرگودھا، خوشاب، ساہیوال، پشاور اور مردان میں بھی درجہ حرارت معمول سے خاصا بلند ہے۔
محکمہ موسمیات نے شہریوں کو ہدایت کی ہے کہ وہ غیر ضروری طور پر دھوپ میں نکلنے سے گریز کریں، زیادہ پانی پئیں اور ہیٹ اسٹروک سے بچاؤ کے لیے احتیاطی تدابیر اختیار کریں۔
