سینیئر صحافی اور العربیہ اردو کے ایڈیٹر منصور جعفر کا کہنا ہے کہ گزشتہ 2 دنوں میں امریکا کی جانب سے مشرق وسطیٰ میں موجود اپنے سفارتکاروں کو دی جانے والی ٹریول ایڈوائزریز اور دیگر اقدامات دیکھ کر یقین ہوگیا تھا کہ اسرائیل ایران پر حملہ کرنے کے لیے تیار ہے مگر اس ساری صورتحال میں ایران محتاط نہ رہا اور اسے ایک ہی حملے میں بہت بڑے نقصان کا سامنا کرنا پڑا۔
وی نیوز سے خصوصی انٹرویو کے دوران منصور جعفر کا کہنا تھا کہ ایران پر حملے سے 2 دن پہلے امریکا نے مشرق وسطیٰ کے ان تمام ممالک میں موجود اپنے سفارتکاروں کو ٹریول ایڈوائزری بھیجی جہاں امریکی اڈے ہیں کہ وہ محفوظ ٹھکانوں پر چلے جائیں، اسی طرح حملے سے صرف ایک دن قبل تل ابیب میں موجود امریکی سفارتکاروں کو بھی ہدایت جاری کردی گئی کہ وہ تل ابیب سے باہر نہ جائیں۔ اسی طرح آئی اے ای اے نے 20 سالوں میں پہلی مرتبہ اپنی رپورٹ میں کہا کہ جوہری توانائی حاصل کرنے کے لیے ایران اصولوں کی خلاف ورزی کررہا ہے، یہ سب غیر معمولی تھا مگر اس کے باوجود ایرانی فوجی قیادت پاسداران انقلاب کے دفترمیں میٹنگ میں مصروف تھی جس کے سبب ایک ہی حملے میں اتنے بڑے نقصان کا سامنا کرنا پڑا۔
ایران پر حملے کے لیے اسرائیل نے کتنے فائٹر جیٹس کا استعمال کیا؟
انہوں نے کہا کہ اسرائیلی حملے کا جواب دینے کے لیے ایران پر دباؤ تو ہے مگر اس کے ہاتھ بندھے ہوئے ہیں، اس کے علاوہ ہمیں یہ بھی سمجھنے کی ضرورت ہے کہ جو اس کی مسلح طاقت ہے اس کا امریکا اور اسرائیل کا تقابل ممکن نہیں ہے۔
انہوں نے کہا کہ ایران کے پاس زیادہ سے زیادہ بیلسٹک میزائلز ہیں یا پھر روس کا استعمال شدہ شروع آئرن ڈوم، جبکہ اس کے مقابلے میں اسرائیل نے بھرپور تیاری کے ساتھ ایران پر حملہ کیا ہے۔ منصور جعفر نے بتایا کہ اسرائیل نے ایران کے 7 مقامات پر 200 فائٹر جیٹس کے ساتھ ایک ساتھ حملہ کیا اور یہ اسرائیلی فضائیہ کی نصف تعداد بنتی ہے۔
منصور جعفر نے بتایا کہ ایران کی جانب سے اب تک 100 ڈرونز اسرائیل بھیجے ہیں اور اس کی وجہ یہ بتائی گئی ہے کہ پہلے یہ دیکھ لیا جائے کہ کس کس مقام پرمیزائل شکن سسٹم موجود ہے تاکہ مستقبل میں ان جگہوں سے احتیاط برتی جائے۔
اسرائیل کے لیے مشکلات کیا ہیں؟
منصور جعفر نے کہا کہ اسرائیل کے بنانے کا مقصد یہی تھا کہ یہاں لوگ پُرامن اور خوشحال زندگی گزار سکیں مگر وہاں صبح سے سائرن بج رہے ہیں اور لوگوں سے کہا جارہا ہے کہ وہ زندگی کو بچانے کے لیے بنکرز میں وقت گزاریں، تو یقینی طور پر مقامی لوگوں کے لیے یہ خوف کا عالم کسی بھی طور پر آسان نہیں ہے اور محض ڈرون اڑنے کی خبر اور بجے والے سائرن نے وہاں کے لوگوں کو مشکل سے دوچار کردیا ہے۔
انہوں نے کہا کہ یہی کچھ 7 اکتوبر 2023 کے بعد ہوا تھا اور جب اسرائیل میں خطرات سے بچنے کے لیے سائرن بجنا شروع ہوئے اور خوف کا عالم بڑھنے لگا تو ایئرپورٹس پر رش لگ گیا اور لوگ ملک سے فرار ہونے کے لیے بے تاب ہونے لگے، اگر یہی صورتحال زیادہ دیر جاری رہتی ہے تو اسرائیل کے لیے حالات بد سے بدتر ہوتے چلے جائیں گے۔
انہوں نے کہا کہ اس کے علاوہ کسی بھی ملک کے لیے مستقل جنگ میں رہنا آسان نہیں ہے اور اسی وجہ سے اسرائیل کی معیشت تباہ حال ہوتی جارہی ہے اور جس دن اسے امریکا کی جانب سے ملنے والی امداد رک جائے تو اس کے لیے قائم رہنما تقریباً ناممکن ہوجائے گا۔
انہوں نے مزید کہا کہ اس کے علاوہ اسرائیل آئی ٹی اور دیگر شعبوں میں ترقی کا خواہ تھا مگر امن و امان کی ایسی صورتحال کے سبب اس کا معاشی پہیہ مکمل طور پر رک چکا ہے۔
مشرق وسطیٰ کا مستقبل کیا ہوگا؟
انہوں نے کہا کہ اس کا دار و مدار خطے کے دیگر ممالک کے ردعمل پر ہے۔ منصور جعفر نے کہا کہ سعودی عرب نے سب سے پہلے اس حملے کی ناصرف مذمت کی بلکہ سعودی وزیر خارجہ نے ایرانی ہم منصب سے رابطہ بھی کیا، اگر اسی طرح خطے کے دیگر ممالک بھی اپنا کردار ادا کریں تو یقیناً اس صورتحال پر قابو پایا جاسکتا ہے ورنہ اسرائیلی وزیراعظم نیتن یاہو ایک بدمست ہاتھی بن چکے اور ان کے دل میں جو آرہا ہے وہ کررہے ہیں۔
ایران پر حملے کے بعد پاکستان کو کیا خطرات ہیں؟
منصور جعفر کا کہنا تھا کہ اس حملے کے بعد پاکستان کے لیے بھی خطرات بڑھ گئے ہیں کیونکہ ایران اور پاکستان کی سرحدیں ملتی ہیں اور سیستان میں فتنۃ الہندوستان اور بلوچ لبریشن آرمی متحرک ہے لہٰذا جو اسرائیلی سری نگر سے بیٹھ کر پاکستان میں ڈرونز بھیج سکتا ہے وہ یقیناً اب بھی خاموش نہیں بیٹھے گا۔
انہوں نے کہا کہ اس کے علاوہ اگر آج ایران کو جوہری طاقت بننے کی اجازت نہیں دی جارہی ہے تو یہ عین ممکن ہے کہ مستقبل میں پاکستان سے بھی یہ صلاحیت لینے کے لیے بھارت اور اسرائیل عالمی طاقتوں کے ساتھ ملکر پاکستان پر حملہ آور ہوں۔ لہٰذا پاکستان کو ابھی سے نہ صرف سفارتی میدان میں متحرک ہونے کی ضرورت ہے بلکہ عسکری طور پر بھی کام کرنے کی ضرورت ہے تاکہ مستقبل میں کسی کی بھی نظر ہم پر نہ پڑ سکے۔
