بلوچستان کے ضلع بارکھان کی تحصیل رکھنی کے مرکزی بازار میں زوردار دھماکے کے نتیجے میں ایک شخص جاں بحق اور متعدد زخمی ہوگئے۔
وی نیوز سے گفتگو کرتے ہوئے متعلقہ ایس ایچ او پولیس ابرار احمد نے بتایا کہ دھماکا شہر کے گنجان آباد بازار ہوا جس کے نتیجے میں ایک شخص جاں بحق جبکہ 12 زخمی ہوئے جن میں سے 2 کی حالت تشویشناک ہے۔
ابرار احمد نے بتایا کہ دھماکے کے فوراً بعد سیکیورٹی فورسز اور امدادی ٹیمیں جائے وقوعہ پر پہنچیں اور سیکیورٹی فورسز نے علاقے کو گھیرے میں لے کر شواہد اکھٹے کرنا شروع کر دیے جبکہ زخمیوں کو قریبی اسپتال منتقل کیا گیا۔
یہ بھی پڑھیے: خضدار اسکول بس پر حملہ، بلوچستان میں اب کیا ہونے والا ہے؟
ابتدائی تحقیقات کے مطابق دھماکا خیز مواد موٹر سائیکل میں نصب کیا گیا تھا جسے ریموٹ کنٹرول سے اڑایا گیا۔
ادھر صوبائی وزیر سردار عبدالرحمان کھیتران نے رکنی دھماکے کی شدید الفاظ میں مذمت کرتے ہوئے کہا کہ دہشت گردی کی اس بزدلانہ کارروائی پر دل گرفتہ ہیں۔
عبدالرحمان کھیتران نے کہا کہ زخمیوں کو فوری اور مکمل طبی سہولیات فراہم کی جائیں اور واقعے میں ملوث عناصر کو قانون کے کٹہرے میں لایا جائے گا۔
انہوں نے کہا کہ دہشت گردی انسانیت کے دشمنوں کا عمل اور معصوم جانوں کا ضیاع ناقابل برداشت سانحہ ہے۔ انہوں نے مزید کہا کہ حکومت متاثرہ خاندانوں کے ساتھ مکمل یکجہتی کا اظہار کرتی ہے اور عوام کے جان و مال کا تحفظ اس کی اولین ترجیح ہے۔
یہ بھی پڑھیے: جعفر ایکسپریس پر حملہ دہشتگردی، ریاست کی رٹ چیلنج کرنے والوں کو نیست و نابود کردیں گے، وزیراعلیٰ بلوچستان
صوبائی وزیر نے کہا کہ زخمیوں کے علاج میں کسی قسم کی کوتاہی برداشت نہیں کی جائے گی۔ انہوں نے کہا کہ متعلقہ اداروں کو امدادی کارروائیاں تیز کرنے کی ہدایت کرتے ہوئے کہا کہ دہشت گردوں کا جلد قلع قمع کیا جائے گا۔
