آرمی چیف فیلڈ مارشل سید عاصم منیر نے اقوامِ متحدہ میں پاکستان کے مستقل مشن کی نمائندہ صائمہ سلیم سے ملاقات کی، جو بینائی سے محروم ہونے کے باوجود عالمی سفارت کاری میں اپنی مثالی خدمات کی بدولت نمایاں مقام حاصل کر چکی ہیں۔
پاک فوج کے شعبہ تعلقات عامہ (آئی ایس پی آر) کے مطابق یہ ملاقات نہایت خوشگوار اور حوصلہ افزا ماحول میں ہوئی، جس میں آرمی چیف نے صائمہ سلیم کی بے مثال صلاحیتوں، قومی خدمت کے جذبے اور اقوام متحدہ میں پاکستان کے مؤقف کو بھرپور انداز میں اجاگر کرنے پر اُنہیں زبردست خراجِ تحسین پیش کیا۔
یہ بھی پڑھیں پاک بھارت تنازع: پاکستانی سیکریٹری خارجہ کی غیرملکی سفارتکاروں کو بریفنگ
فیلڈ مارشل عاصم منیر نے کہاکہ صائمہ سلیم کی استقامت اور ثابت قدمی پوری قوم، بالخصوص معذور افراد کے لیے ایک روشن مثال ہے۔ اُنہوں نے اعادہ کیاکہ پاکستان آرمی معذور افراد کی مکمل معاونت اور ان کی قومی ترقی میں شمولیت کے لیے پرعزم ہے۔
Grateful to COAS Field Marshal Syed Asim Munir for his valuable time and kind appreciation. Deeply inspired by his leadership and vision for Pakistan. pic.twitter.com/67fBdGy5jZ
— Saima Saleem (@SSaima11) June 20, 2025
صائمہ سلیم نے اقوامِ متحدہ میں اپنی سفارتی خدمات، درپیش چیلنجز اور پاکستان کے اہم مؤقف پر آرمی چیف کو بریفنگ دی۔
آرمی چیف نے اقوام متحدہ میں بھارتی ریاستی سرپرستی میں ہونے والی دہشتگردی کو اجاگر کرنے اور پاکستان کے علاقائی و عالمی مؤقف کو مؤثر انداز میں پیش کرنے پر اُن کی کوششوں کو سراہا۔
یہ ملاقات اس بات کا ثبوت ہے کہ پاکستانی قوم کی بے پناہ صلاحیتیں اور خدمتِ وطن کا جذبہ کسی جسمانی معذوری کا محتاج نہیں ہوتا۔
یہ بھی پڑھیں اقوام متحدہ میں پاکستان کی نمائندگی کرنے والی صائمہ سلیم کون ہیں؟
صائمہ سلیم نے دوران ملاقات اپنی ادبی تخلیقات بھی آرمی چیف کو پیش کیں، جنہیں سراہا گیا۔
