اٹلس ہنڈا نے منگل کے روز رواں مالی سال کے دوران پاکستانی صارفین کے لیے ایک الیکٹرک اسکوٹر متعارف کرانے کا اعلان کیا ہے۔
پاکستان اسٹاک ایکسچینج کو بھیجے گئے ایک باضابطہ نوٹس میں کمپنی نے حکومت کی جانب سے ’نیشنل الیکٹرک وہیکل پالیسی‘ کے اعلان کے بعد اپنی ارادے کا اظہار کیا۔
یہ بھی پڑھیں: پاکستان میں الیکٹرک وہیکل پالیسی 30-2025 کا باضابطہ آغاز، ماحولیاتی تحفظ اور صنعتی خود کفالت کی نئی راہ متعین
وزیراعظم کے معاونِ خصوصی برائے صنعت و پیداوار، ہارون اختر خان کے مطابق، نئی الیکٹرک وہیکل پالیسی وزیراعظم کے صاف، پائیدار اور سستی ٹرانسپورٹ کو فروغ دینے کے وژن سے ہم آہنگ ہے، اور اس کا مقصد مقامی صنعت کی حوصلہ افزائی کے ساتھ ساتھ ماحول کا تحفظ بھی ہے۔
With 26M+ bikes on the road, Pakistan’s emissions are sky-high.
Enter BENLEY e ⚡Atlas Honda’s EV scooter arrives this year as part of a bold move to cut carbon and save $1B in fuel. pic.twitter.com/rLGuN7ElD8— Adeel Afzal (@AdeelAfzal06) June 24, 2025
ہارون اختر نے بتایا کہ اس پالیسی کے تحت ایک بڑا ہدف یہ ہے کہ 2030 تک پاکستان میں فروخت ہونے والی نئی گاڑیوں میں سے 30 فیصد الیکٹرک ہوں، اس تبدیلی کے نتیجے میں سالانہ 2.07 ارب لیٹر ایندھن کی بچت متوقع ہے، جو لگ بھگ ایک ارب ڈالر کے زرمبادلہ کی بچت کے برابر ہے۔
دوسری جانب اٹلس ہونڈا نے کہا ہے کہ وہ متعلقہ ریگولیٹری اداروں کے ساتھ قریبی تعاون کر رہا ہے تاکہ تمام ضروری اجازت نامے اور منظوری حاصل کی جاسکے اور اسکوٹر کی باآسانی مارکیٹ میں آمد کو یقینی بنایا جا سکے۔
کمپنی نے پاکستان اسٹاک ایکسچینج کو بتایا کہ ضروری معیار اور سڑکوں پر ٹیسٹنگ مکمل کرنے کے بعد، کمپنی رواں مالی سال کے دوران پروڈکٹ لانچ کرنے کا ارادہ رکھتی ہے۔
مزید پڑھیں:اٹلس ہنڈا نے موٹر سائیکل کی قیمتوں میں رواں برس چوتھی بار اضافہ کردیا
ہونڈا ماضی میں بھی الیکٹرک گاڑیوں کی آزمائش کر چکا ہے، 2023 میں کمپنی نے اپنی الیکٹرک اسکوٹر بینلےای کی شیخوپورہ فیکٹری میں ایک ‘سافٹ’ لانچ کے دوران نقاب کشائی کی تھی۔
صنعتی ماہرین کے مطابق، پاکستان کی دو پہیوں والی گاڑیوں کی مارکیٹ میں نمایاں حیثیت رکھنے والی اٹلس ہونڈا کی شمولیت سے ملک میں الیکٹرک بائیکس کے استعمال کو بڑا فروغ ملنے کی توقع ہے۔
واضح رہے کہ اس وقت پاکستانی سڑکوں پر تقریباً 2 کروڑ 60 لاکھ موٹر سائیکلیں موجود ہیں جو کاربن کے اخراج میں نمایاں کردار ادا کرتی ہیں، الیکٹرک بائیکس کی طرف منتقلی ماحولیاتی بہتری میں خاطر خواہ کردار ادا کر سکتی ہے، کیونکہ ملک میں کاربن کے اخراج میں سب سے بڑا حصہ سڑکوں پر چلنے والی ٹریفک کا ہے۔
