ایران نے بالآخر تسلیم کر لیا ہے کہ امریکی اور اسرائیلی حملوں کے نتیجے میں اس کی جوہری تنصیبات کو شدید نقصان پہنچا ہے۔
یہ بھی پڑھیں: جنگ بندی کے باوجود ایرانی فضائی حدود کی بندش میں توسیع کا فیصلہ
ایرانی وزارت خارجہ کے ترجمان اسماعیل بقائی نے الجزیرہ سے گفتگو میں اس بات کی تصدیق کی کہ ایران کی جوہری تنصیبات پر کئی بار حملے کیے گئے جن سے ان کا ڈھانچہ بری طرح متاثر ہوا ہے۔
اسماعیل بقائی نے کہا ’جی ہاں، ہماری جوہری تنصیبات کو بری طرح نقصان پہنچا ہے، یہ بات یقینی ہے کیونکہ ان پر بار بار حملے کیے گئے ہیں۔‘ تاہم انہوں نے اس معاملے کی مزید تفصیلات فراہم کرنے سے گریز کیا اور کہا کہ یہ ایک تکنیکی معاملہ ہے جس پر ایران کی ایٹمی توانائی تنظیم اور دیگر متعلقہ ادارے کام کررہے ہیں۔
یہ بھی پڑھیں: ٹرمپ کی جنگ بندی کے سنسنی خیز 48 گھنٹے
یہ بیان ایرانی حکام کی جانب سے پہلا باقاعدہ اعتراف ہے جس میں امریکی اور اسرائیلی حملوں سے جوہری تنصیبات کو سنگین نقصان پہنچنے کی تصدیق کی گئی ہے۔
یاد رہے کہ چند روز قبل امریکی صدر ڈونلڈ ٹرمپ نے دعویٰ کیا تھا کہ ایران کی جوہری تنصیبات مکمل طور پر تباہ کردی گئی ہیں، جبکہ اس سے قبل امریکی میڈیا رپورٹس میں کہا گیا تھا کہ حملوں سے صرف ایران کے جوہری پروگرام میں چند ماہ کی تاخیر ہوئی ہے، مکمل تباہی نہیں ہوئی۔
یہ بھی پڑھیں: پاک بھارت اور ایران اسرائیل جنگ بندی کے اعلانات، صدر ٹرمپ کے بیانات میں کیا مماثلت رہی؟
واضح رہے کہ ہفتے کے روز امریکا نے ایران اسرائیل کشیدگی کے دوران ایرانی جوہری تنصیبات پر بمباری کی تھی۔ امریکی صدر کے مطابق یہ حملے فردو، نطنز اور اصفہان میں واقع تنصیبات پر کیے گئے۔ یہ کارروائی ایران کی جوہری صلاحیت پر شدید ضرب تصور کی جا رہی ہے۔
