ایران کے مرکزی فوجی ہیڈکوارٹر خاتم الانبیا نے تصدیق کی ہے کہ ادارے کے سربراہ کمانڈر علی شادمانی، جو حالیہ اسرائیلی فضائی حملے میں شدید زخمی ہوئے تھے، زخموں کی تاب نہ لاتے ہوئے انتقال کر گئے ہیں۔
یہ بھی پڑھیں:اسرائیلی میں شہید ہونے والے ایرانی ملٹری چیف جنرل باقری کون تھے؟
چینی خبر رساں ایجنسی شِنہوا کے مطابق کمانڈر شادمانی گزشتہ ہفتے اسرائیلی فضائی حملے میں زخمی ہوئے تھے۔ انہوں نے حال ہی میں جنرل غلام علی رشید کی جگہ یہ عہدہ سنبھالا تھا۔ نیم سرکاری ایرانی خبر ایجنسی تسنیم کے مطابق، ان کی حالت حملے کے بعد سے تشویشناک تھی۔
اسرائیلی فوج نے دعویٰ کیا تھا کہ گزشتہ ہفتے تہران کے مرکزی کمانڈ سینٹر پر رات گئے کیے گئے حملے میں علی شادمانی کو ہدف بنایا گیا تھا، جس کے نتیجے میں وہ مارے گئے۔
یہ بھی پڑھیں:جنگ یا نسل کشی؟ ایران میں سائنسدانوں کے اہلِ خانہ کی ٹارگٹ کلنگ
یاد رہے کہ 13 جون کو اسرائیل نے ایران کے مختلف علاقوں میں بڑے پیمانے پر فضائی حملے کیے تھے، جن میں جوہری اور فوجی تنصیبات کو نشانہ بنایا گیا۔ ان حملوں میں کئی اعلیٰ ایرانی فوجی افسران، جوہری سائنس دان اور متعدد شہری جاں بحق ہوئے تھے۔ ایران نے اس کے جواب میں اسرائیل پر کئی میزائل اور ڈرون حملے کیے، جن سے بھاری جانی و مالی نقصان ہوا۔
