ملک بھر میں مون سون بارشوں کا سلسلہ وقفے وقفے سے جاری ہے، مگر اس کے باوجود حبس اور گرمی کی شدت برقرار ہے۔ پنجاب کے مختلف اضلاع گوجرانوالہ، لاہور، سیالکوٹ، سرگودھا اور فیصل آباد میں تیز ہواؤں اور موسلادھار بارش نے موسم کو تو خوشگوار بنایا مگر نشیبی علاقوں کے زیر آب آنے کا خطرہ بڑھ گیا ہے۔
اسلام آباد اور گردونواح میں بھی آئندہ چند گھنٹوں میں موسلادھار بارش کی پیشگوئی کی گئی ہے۔ ادھر مری، گلیات، کشمیر اور گلگت بلتستان میں آج مزید بارشوں کا امکان ہے۔
محکمہ موسمیات نے خبردار کیا ہے کہ پہاڑی علاقوں میں لینڈ سلائیڈنگ کا خطرہ موجود ہے، جس کے باعث ٹریفک کی روانی متاثر ہوسکتی ہے۔ چترال، دیر، سوات، بونیر، شانگلہ، مانسہرہ اور ایبٹ آباد کے برساتی نالوں میں طغیانی کا خدشہ ظاہر کیا جا رہا ہے۔
مزید پڑھیں: موسمیاتی تبدیلی ایک بڑھتا ہوا عالمی بحران اور پاکستان کی آزمائش
محکمہ موسمیات کے مطابق کہوٹہ، کلر سیداں، ڈڈیال اور کوٹلی میں بادل برسانے والا نیا نظام بن رہا ہے، جو آئندہ 3 سے 6 گھنٹوں میں کشمیر، شمال مشرقی پنجاب، اسلام آباد اور بالائی خیبرپختونخوا تک پھیل سکتا ہے۔
این ڈی ایم اے نے تمام متعلقہ اداروں کو الرٹ جاری کر دیا ہے اور شہریوں کو ہدایت کی ہے کہ موسلادھار بارش کے دوران احتیاطی تدابیر اختیار کریں اور ندی نالوں کے قریب جانے سے گریز کریں۔
