وزیراعلیٰ پنجاب مریم نواز نے راولپنڈی میں نواز شریف فلائی اوور منصوبے کا افتتاح کردیا۔
افتتاحی تقریب سے خطاب کرتے ہوئے وزیراعلیٰ پنجاب مریم نواز نے کہاکہ راولپنڈی کے شہریوں کے لیے یہ منصوبہ گیم چینجر ثابت ہوگا۔
یہ بھی پڑھیں: وزیراعلیٰ مریم نواز کا لاہور کے جدید ترین منصوبے ’روٹ 47‘ کا افتتاح
مریم نواز نے کہاکہ پنجاب میں اب تک 12 ہزار کلومیٹر پر محیط سڑکیں بن چکی ہیں، صوبے میں ترقیاتی منصوبوں پر کام تیزی سے چل رہا ہے۔
انہوں نے کہاکہ پنجاب میں صاف پانی کی کمی کو پورا کرنے کے لیے فنڈز فراہم کیے جارہے ہیں، جنوبی پنجاب کے عوام کو بھی صاف پانی مہیا کیا جائےگا۔
مریم نواز نے کہاکہ پنجاب کے ہر شہر میں سیوریج کا نظام بہتر کیا جائےگا، میں پنجاب میں تزئین و آرائش کے کاموں کی خود نگرانی کررہی ہوں۔ ستھرا پنجاب کے ورکرز شاباش کے مستحق ہیں۔
وزیراعلیٰ نے کہاکہ پنجاب میں سڑکوں کی تعمیر و مرمت سے عوام مطمئن ہیں، ٹیم ورک کی وجہ سے آج ہم کامیاب ہوئے ہیں۔
یہ بھی پڑھیں: لاہور کی اسمارٹ سڑک جو بجلی بھی پیدا کرےگی
انہوں نے مزید کہاکہ عاشورہ محرم الحرام پُرامن طریقے سے گزر گیا، اور اس دوران مذہبی ہم آہنگی نظر آئی جو خوش آئند ہے۔
