وزیراعلیٰ پنجاب مریم نواز شریف نے آج صوبائی دارالحکومت لاہور کا دورہ کیا اور شہر میں جاری ترقیاتی منصوبوں کا تفصیلی جائزہ لیا، اس دوران انہوں نے والٹن روڈ پر بننے والے نئے اوور ہیڈ برج اور حال ہی میں مکمل ہونے والے جدید انفرا اسٹرکچر مشتمل منصوبے ’روٹ 47‘ کا معائنہ کیا۔
یہ بھی پڑھیں: ایک سال میں ایئر پنجاب لانے کا فیصلہ، اب تک کتنی تیاری ہوچکی؟
’روٹ 47‘ کو باقاعدہ طور پر عام ٹریفک کے لیے کھول دیا گیا ہے، 4.5 کلومیٹر طویل، 2 طرفہ اور 3 رویہ یہ سڑک جدید اسمارٹ سٹی اصولوں کے تحت تعمیر کی گئی ہے، جو لاہور کی پہلی مکمل اسمارٹ اور انفراسٹرکچر سے مزین شاہراہ ہے۔
وزیراعلیٰ مریم نواز شریف نے لاہور میں "روٹ 47" اور نئے اوور ہیڈ برج کا معائنہ کیا۔ گلبرگ سے والٹن تک سمارٹ انفراسٹرکچر مکمل فعال، پیدل اور سائیکل سواروں کے لیے الگ راستے، سولر بجلی، پانی ذخیرہ کرنے کی سہولت۔ یہ صرف سڑک نہیں، جدید لاہور کی نئی پہچان ہے۔ pic.twitter.com/4VfZ2TnylQ
— Malik Sohaib Ahmed Bherth (@SohaibBherthMPA) June 23, 2025
یہ سڑک کلمہ چوک کو والٹن سے منسلک کرتی ہے اور اسے 1947 کی جدوجہدِ آزادی سے منسوب کیا گیا ہے، جس کی مناسبت سے اسے ’روٹ 47‘ کا نام دیا گیا ہے، اس شاہراہ کی بدولت گلبرگ سے والٹن تک کا سفر اب چند منٹوں میں ممکن ہو گیا ہے۔
وزیراعلیٰ مریم نواز نے کہا کہ یہ صرف ایک سڑک نہیں بلکہ پنجاب میں اسمارٹ ترقی کی ایک نئی داستان ہے، جو پائیدار، ماحول دوست اور شہری ضروریات کے مطابق ہے۔
مزید پڑھیں: کامسیٹ یونیورسٹی میں مفت داخلے، پنجاب حکومت کی بڑی پیشکش کس کے لیے؟
روٹ 47 پر 2.5 کلومیٹر طویل سائیکل لین، پیدل چلنے والوں کے لیے مخصوص واک وے، اور والٹن ریلوے کراسنگ فلائی اوور پر سولر پینلز نصب کیے گئے ہیں، جن سے ایک میگا واٹ تک بجلی پیدا ہوگی۔
اس کے علاوہ، سڑک کے ساتھ 50 لاکھ گیلن بارش کا پانی ذخیرہ کرنے کے لیے مصنوعی جھیل، فوارے اور ایریگیشن سسٹم نصب کیے گئے ہیں، جو اس منصوبے کو ماحولیاتی طور پر بھی منفرد بناتے ہیں۔ شاہراہ کی شناخت کو اجاگر کرنے کے لیے مختلف مونیومنٹس بھی نصب کیے گئے ہیں، جو اس کے جمالیاتی حسن میں مزید اضافہ کرتے ہیں۔
مزید پڑھیں: وزیراعلیٰ پنجاب مریم نواز کی طبیعت خراب، میو اسپتال میں چیک اپ
وزیراعلیٰ مریم نواز شریف نے منصوبے کو پنجاب کے روشن اور پائیدار مستقبل کی جانب ایک نمایاں قدم قرار دیا اور کہا کہ عوام کو بہتر، محفوظ اور ماڈرن سفری سہولیات فراہم کرنا حکومت پنجاب کی اولین ترجیح ہے۔
