اداکارہ حمیرا اصغر کے گھر والوں نے بیٹی کی لاش وصول کرنے سے انکار کر دیا ہے۔ حمیرا کے والد کا کہنا ہے کہ انہوں نے بہت عرصہ قبل ہی حمیرا سے قطع تعلق کر لیا تھا۔
پولیس کے مطابق حمیرا کے والد اور بھائی سے رابطہ کیا گیا تو انہوں نے کراچی آنے سے انکار کر دیا۔ ایس ایس پی ساؤتھ مہزورعلی کا کہنا ہے کہ اداکارہ کے والدکو سمجھایا ہے کہ کراچی آکرلاش وصول کریں تاہم انہوں نے دوبارہ پولیس سے رابطہ نہیں کیا۔
پولیس کا کہنا ہے کہ حمیرا کی لاش اس وقت چھیپا سرد خانے میں موجود ہے، اور اس کا پوسٹ مارٹم مکمل کرلیا گیا ہے۔ کوشش کر رہے ہیں کہ اداکارہ کے گھر والے آجائیں تاکہ کارروائی کو آگے بڑھائیں۔
حمیرا اصغر کے والد نے کہاکہ حمیرا ایک عرصے سے کراچی شفٹ ہوچکی تھی۔ ہمیں اس کی کوئی خبر نہیں تھی، نہ ہی کوئی تعلق تھا۔ وہ اپنی زندگی جی رہی تھی اور ہم اپنی زندگی گزار رہے ہیں۔
انہوں نے کہاکہ اس وقت بھی ہمارا اس معاملے سے کوئی لینا دینا نہیں ہے، نہ ہی ہمیں اس کی میت سے کوئی غرض ہے۔
ان کا مزید کہنا تھا کہ اس کے علاوہ اس کے ساتھ جو معاملہ پیش آیا ہے وہ تحقیقاتی اداروں سے متعلق ہے، ہمیں اس سے دور رکھا جائے، ہمارا اس سے بھی کوئی تعلق نہیں۔
یہ بھی پڑھیں: ’حمیرا کی موت اس جھوٹی دنیا کا چہرہ ہے جہاں’فالوورز‘ ہوتے ہیں دوست نہیں‘
پولیس نے بتایا کہ خاتون 7 سال سے فلیٹ میں اکیلی رہ رہی تھیں، 2018 میں فلیٹ کرائے پر لیا تھا اور وہ 2024 سے کرایہ نہیں دے رہی تھیں۔ فلیٹ کے مالک نے کرایہ نہ ملنے پر قانونی کارروائی کرتے ہوئے کیس دائر کیا تھا، اور گزشتہ روز عدالتی بیلف کے ہمراہ جب فلیٹ خالی کروانے کے لیے ٹیم پہنچی تو لاش برآمد ہوئی۔
واضح رہے کہ حمیرا اصغر کی لاش گزشتہ روز کراچی کے پوش علاقے ڈیفنس کے ایک فلیٹ سے برآمد ہوئی، اور مختلف اطلاعات کے مطابق وہ قریباً ایک ماہ پہلے انتقال کر چکی تھیں۔ ان کی موت کی وجہ تاحال غیر واضح ہے۔
