ہیونڈائی کا اپنی معروف ایس یو وی کی قیمتیں بڑھانے کے 2 دن بعد خصوصی رعایت کا اعلان
نیو انرجی لیوی عائد ہونے کی وجہ سے قیمتوں میں اضافے کے کچھ ہی دن بعد، ہیونڈائی نے اپنی مقبول ایس یو وی Santa Fe پر خصوصی رعایت کا اعلان کر دیا۔
گزشتہ دنوں کمپنی نے نیو انرجی لیوی کے تحت اپنی گاڑیوں کی قیمتوں میں نمایاں اضافہ کیا تھا جس سے قیمتیں 6 لاکھ 31 ہزار روپے تک بڑھا دی گئی تھیں۔ اس فیصلے پر صارفین اور آٹو انڈسٹری سے وابستہ افراد نے شدید ردِ عمل دیا تھا۔ تاہم ہیونڈائی نے اب اپنے صارفین کے لیے ایک متوازن پیشکش متعارف کروا دی ہے، جو کہ صرف سانٹا فی کے خریداروں کے لیے ہے۔
یہ بھی پڑھیے: فنانس بل کے تحت لیوی کا نفاذ، ہونڈا اٹلس نے گاڑیوں کی قیمت میں اضافہ کردیا
کمپنی کے جاری کردہ اعلامیہ کے مطابق اس ایس یو وی کے 2 مختلف ویریئنٹس پر قابلِ ذکر رعایت دی جا رہی ہے،Santa Fe Signature AWD کی اصل قیمت14,995,000 روپے تھی جس پر 7 لاکھ روپے کی رعایت دی گئی ہے۔ رعایت کے بعد نئی قیمت 14,295,000 روپے ہو گئی ہے۔
اسی طرح Santa Fe Smart FWD کی اصل قیمت 13,250,000 روپے ہے، جس پر 4 لاکھ روپے کی رعایت دی گئی ہے۔ نئی قیمت 12,850,000 روپے ہو گئی ہے۔
کمپنی کی طرف سے جاری اعلامیے کے مطابق یہ آفر 31 جولائی 2025 تک محدود ہے۔
