پاکستان تحریک انصاف نے 26ویں آئینی ترمیم کے حق میں ووٹ دینے پر اپنی صفوں میں شامل 5 اراکین قومی اسمبلی کو پارٹی سے برطرف کردیا ہے۔
چیئرمین پی ٹی آئی بیرسٹر گوہر علی کے مطابق یہ فیصلہ آئین اور جماعتی پالیسی سے انحراف پر کیا گیا۔
یہ بھی پڑھیں: 26 ویں آئینی ترمیم پر پی ٹی آئی کا کردار مشکوک ہے، حافظ نعیم الرحمان
جاری کردہ نوٹیفکیشن میں کہا گیا ہے کہ پارٹی پالیسی کی خلاف ورزی کرنے والے ارکان اورنگزیب کھچی، مبارک زیب خان، عثمان علی، ظہور قریشی اور الیاس چوہدری کو باضابطہ طور پر تحریک انصاف سے نکال دیا گیا ہے۔
بیرسٹر گوہر نے اس اقدام کے بارے میں گفتگو کرتے ہوئے کہاکہ یہ پانچوں ارکان اب قومی اسمبلی کی رکنیت کے بھی اہل نہیں رہے۔ ان کا کہنا تھا کہ پارٹی نظم و ضبط پر کوئی سمجھوتہ نہیں کرے گی اور پالیسی سے انحراف کرنے والوں کے خلاف سخت کارروائی کی جائے گی۔
دوسری جانب پاکستان تحریک انصاف نے عمران خان کی رہائی کے لیے احتجاجی تحریک کا آغاز کردیا ہے، اور دعویٰ کیا گیا ہے کہ احتجاجی تحریک 5 اگست تک اپنے عروج پر ہوگی۔
یہ بھی پڑھیں: عمران خان کی رہائی کی تحریک کہاں سے اور کیسے چلے گی؟ عالیہ حمزہ نے پارٹی قیادت کی حکمت عملی پر سوال اٹھا دیا
پی ٹی آئی پنجاب کی چیف آرگنائزر عالیہ حمزہ نے لاہور میں ہونے والے اجلاس میں مدعو نہ کرنے پر پارٹی کی حکمت عملی پر سوال اٹھاتے ہوئے کہا ہے کہ بتایا جائے عمران خان کی رہائی کے لیے تحریک کا آغاز کب اور کہاں سے ہوگا۔
