پاکستان کے امریکا میں سفیر رضوان سعید شیخ نے واضح کیا ہے کہ اسلام آباد پر اسرائیل کو تسلیم کرنے کے حوالے سے واشنگٹن کی جانب سے کسی قسم کا دباؤ نہیں ہے۔ ان کا کہنا تھا کہ پاکستان کی اسرائیل سے متعلق پالیسی قائداعظم محمد علی جناح کے اصولوں اور وژن کی روشنی میں طے کی گئی ہے۔
امریکی دارالحکومت میں ایک تقریب سے خطاب کرتے ہوئے سفیر نے کہا کہ اسرائیل سے متعلق ہمارے مؤقف میں کوئی ابہام نہیں، اور امریکا نے اس حوالے سے پاکستان پر کسی قسم کی زور زبردستی نہیں کی۔
انہوں نے پاکستان اور امریکا کے درمیان دوطرفہ تعلقات میں بہتری کا ذکر کرتے ہوئے کہا کہ دونوں ممالک تجارت، توانائی اور ٹیکنالوجی کے شعبوں میں قریبی تعاون بڑھانے کے لیے کوشاں ہیں۔ تعلقات میں مثبت پیشرفت اور باہمی مفادات کو سامنے رکھتے ہوئے شراکت داری مزید مستحکم ہو رہی ہے۔
مزید پڑھیں: نیتن یاہو غزہ مذاکرات سبوتاژ کرکے ٹرمپ انتظامیہ کے لیے ذلت کا باعث بن گئے، اسرائیلی اخبار ہاریٹز
ڈیجیٹل معیشت کے حوالے سے گفتگو کرتے ہوئے رضوان سعید شیخ نے بتایا کہ پاکستان میں سرمایہ کاری کے بے شمار مواقع موجود ہیں، خصوصاً کرپٹو کرنسی مائننگ اور متعلقہ ٹیکنالوجیز میں، جہاں پاکستان کے پاس وافر بجلی کے وسائل میسر ہیں۔
انہوں نے اس امر پر بھی روشنی ڈالی کہ حکومتِ پاکستان نے حال ہی میں ڈیجیٹل اور ورچوئل اثاثہ جات سے متعلق ایک جامع ریگولیٹری فریم ورک کی تیاری کا عمل شروع کردیا ہے، جو ملکی اور غیر ملکی سرمایہ کاروں کے لیے ایک مضبوط بنیاد فراہم کرے گا۔
