ایف بی آر کو دیے گئے اضافی اختیارات کے حوالے سے وزیر خزانہ نے واضح کیا کہ یہ اختیارات انکم ٹیکس کے بجائے صرف سیلز ٹیکس فراڈ سے متعلق ہیں، اور ان کا اطلاق صرف اُن معاملات میں ہوگا جہاں فراڈ کی رقم 5 کروڑ روپے سے تجاوز کرے گی۔
کراچی میں اوورسیز چیمبر آف کامرس میں صحافیوں کو بریفنگ دیتے ہوئے وزیر خزانہ محمد اورنگزیب نے کہا کہ معاشی استحکام کے لیے بینکوں کا کردار نہایت اہم ہے، اور حکومت اس ضمن میں کمرشل بینکوں کو فعال کردار ادا کرنے کی ترغیب دے رہی ہے۔
وزیر خزانہ نے بتایا کہ آج اسٹیٹ بینک کے گورنر اور کمرشل بینکوں کے صدور کے ساتھ ملاقات ہوئی، جس میں بینکاری شعبے کے ذریعے معاشی بہتری کے امکانات پر تبادلہ خیال کیا گیا۔ ان کا کہنا تھا کہ ’ہم نے بینکوں سے دریافت کیا ہے کہ وہ معاشی استحکام میں اپنا کردار کیسے ادا کر سکتے ہیں۔‘
یہ بھی پڑھیں: حکومت کاروباری برادری کے ساتھ مشاورت پر مبنی پالیسی جاری رکھنے کے لیے پرعزم ہے، وزیر خزانہ
انہوں نے کہا کہ زرعی اور نجی شعبے کو دیے جانے والے قرضوں میں اضافہ ہوا ہے، لیکن اس میں مزید وسعت کی ضرورت ہے۔ نجکاری کے عمل میں بھی بینکوں کا کردار ناگزیر قرار دیا گیا، جبکہ بیمار صنعتی یونٹس کو بحال کرنے کے لیے بینکوں اور سرمایہ کاروں کے اشتراک کو فروغ دینے پر زور دیا گیا۔
محمد اورنگزیب نے اس بات کی بھی تصدیق کی کہ بیرونی سرمایہ کاروں کے منافع کی منتقلی اور لیٹر آف کریڈٹ نہ کھلنے جیسے مسائل اب ختم ہو چکے ہیں۔ انہوں نے بتایا کہ مالی سال 30 جون 2025 کو ختم ہونے تک ملٹی نیشنل کمپنیوں نے 2.3 ارب ڈالر کا منافع ملک سے باہر منتقل کیا ہے۔
مزید پڑھیں:وفاقی حکومت قرض لے کر ریلیف دے رہی ہے، اخراجات میں کمی ناگزیر ہے، وزیر خزانہ محمد اورنگزیب
ایف بی آر کو دیے گئے اضافی اختیارات کے حوالے سے بات کرتے ہوئے وزیر خزانہ نے واضح کیا کہ یہ اختیارات انکم ٹیکس کے بجائے صرف سیلز ٹیکس فراڈ سے متعلق ہیں، اور ان کا اطلاق صرف اُن معاملات میں ہوگا جہاں فراڈ کی رقم 5 کروڑ روپے سے تجاوز کرے گی۔ انہوں نے مزید کہا کہ گرفتاری کا اختیار کمشنر کو نہیں بلکہ ایک 3 رکنی اعلیٰ سطحی کمیٹی کو حاصل ہوگا۔
تنخواہ دار طبقے سے متعلق سوال پر وزیر خزانہ نے بتایا کہ حکومت نے ان کے لیے ٹیکس گوشواروں کا فارم آسان بنا کر ایف بی آر کی ویب سائٹ پر اپ لوڈ کر دیا ہے۔ ’گنجائش کے مطابق تنخواہ دار طبقے کو ریلیف فراہم کر دیا گیا ہے، اور ان کی سہولت کے لیے گوشواروں کو آسان بنایا گیا ہے۔‘
مزید پڑھیں: پاکستان امریکا کے ساتھ معاشی تعاون بڑھانے کا خواہاں ہے، وزیر خزانہ محمد اورنگزیب
وزیر خزانہ محمد اورنگزیب نے کہا ہے کہ تنخواہ دار طبقے کے لیے ٹیکس گوشواروں کا نہایت آسان فارم ایف بی آر کی ویب سائٹ پراپ لوڈ کر دیا گیا ہے، جس کا دائرہ کار آئندہ مرحلے میں چھوٹے تاجروں اور ایس ایم ایز تک بھی بڑھایا جائے گا۔
انہوں نے بتایا کہ حکومت کی جانب سے رواں ماہ کے دوران 75 ارب روپے کے سیلز ٹیکس ریفنڈز جاری کیے جا چکے ہیں، جو کاروباری طبقے کے اعتماد کی بحالی کی جانب اہم قدم ہے۔
وزیر خزانہ کا کہنا تھا کہ بلاشبہ ہر وزیر خزانہ کی خواہش ہوتی ہے کہ ملک میں فوری طور پر شرح نمو میں اضافہ ہو، لیکن ایسا کرنا زرمبادلہ کے ذخائر پر شدید دباؤ کا باعث بنتا ہے، جس سے معیشت دوبارہ غیر مستحکم ہو سکتی ہے۔
