کمپنی باغ مری میں واقع گورنمنٹ سید محمد حسین ٹی بی اسپتال کی اپ گریڈیشن کا کام تیزی سے جاری ہے۔ اسپتال کی نئی بلڈنگ میں مختلف بلاکس کی تعمیر مکمل ہونے کے قریب ہے، جن میں جدید طبی سہولیات فراہم کی جائیں گی۔
اسپتال کے ایم ایس ڈاکٹر قیصر عباسی کے مطابق اپ گریڈیشن کے اس مرحلے میں دل کے امراض کے لیے علیحدہ کارڈیک وارڈ بھی تعمیر کیا جا رہا ہے۔
انہوں نے مزید بتایا کہ نئی عمارت کے مختلف بلاکس کو معروف شخصیات کے نام سے منسوب کرنے کی تجویز محکمہ صحت کو بھیجی گئی ہے، جن میں ایک بلاک کو میاں نواز شریف وارڈ کے نام سے منسوب کرنے کی سفارش بھی شامل ہے۔
اپ گریڈیشن مکمل ہونے کے بعد مری اور گردونواح کے شہریوں کو نہ صرف ٹی بی بلکہ دیگر سنگین امراض کے علاج کے لیے بھی بہتر سہولیات دستیاب ہوں گی۔ عوامی حلقے اس اقدام کو خوش آئند قرار دے رہے ہیں۔
