پنجاب اسمبلی میں پاکستان تحریکِ انصاف کے 26 معطل ارکان کے معاملے پر قائم مذاکراتی کمیٹی کا تیسرا اجلاس 17 جولائی کو منعقد ہو گا۔ اس سلسلے میں اسمبلی سیکریٹریٹ نے باضابطہ نوٹیفکیشن جاری کر دیا ہے۔
نوٹیفکیشن کے مطابق، 19 رکنی مذاکراتی کمیٹی 17 جولائی بروز بدھ شام 4 بجے اجلاس کرے گی۔ کمیٹی میں حکومت اور اپوزیشن دونوں کے ارکان شامل ہیں تاکہ معاملے کے حل کے لیے متوازن اور سنجیدہ گفتگو کو یقینی بنایا جا سکے۔
یہ بھی پڑھیں:نااہلی کا سوال اٹھا تو فیصلہ کروں گا، ریفرنس نہیں بھیج رہا، اسپیکر پنجاب اسمبلی ملک احمد خان
کمیٹی میں حکومتی نمائندوں میں وزیر خزانہ مجتبیٰ شجاع الرحمن، وزیر صحت خواجہ سلمان رفیق، سمیع اللہ خان، رانا محمد ارشد، وزیر صنعت چوہدری شافع حسین، سید علی حیدر گیلانی، چوہدری افتخار چھچھر، راحیلہ خادم حسین، امجد علی جاوید، احمد اقبال اور شعیب صدیقی شامل ہیں۔
جبکہ اپوزیشن کی نمائندگی ملک احمد خان بھچر، اعجاز شفیع، معین ریاض، رانا شہباز اور علی امتیاز وڑائچ کریں گے۔
مزید پڑھیں:پنجاب اسمبلی کے معطل ارکان سے اظہارِ یکجہتی کے لیے خیبرپختونخوا کا قافلہ لاہور روانہ
واضح رہے کہ پی ٹی آئی کے 26 ارکان کو ایوان کی کارروائی میں خلل ڈالنے پر معطل کیا گیا تھا، جس کے بعد سیاسی کشیدگی میں اضافہ دیکھنے میں آیا۔ مذکورہ کمیٹی کا مقصد تناؤ کم کرنا اور جمہوری عمل کو بحال رکھنا ہے۔
مذاکرات کے پچھلے 2 ادوار میں ابتدائی نوعیت کی بات چیت ہوئی، تاہم فیصلہ کن پیش رفت کا انحصار تیسرے اجلاس پر ہوگا۔
