میٹا کی جانب سے مقبول میسجنگ ایپلیکیشن واٹس ایپ میں مسلسل نئی اور بہتر سہولیات متعارف کرائی جا رہی ہیں، حال ہی میں متعارف کی گئی ’پرائیویٹ میسیج سمریز‘ فیچر کو اپ گریڈ کیا جا رہا ہے، جس کا مقصد صارفین کو بغیر تمام پیغامات پڑھے تیزی سے گفتگو کا خلاصہ فراہم کرنا ہے۔
پرائیویٹ میسیج سمریز ایک آرٹیفیشل انٹیلیجنس پر مبنی فیچر ہے، جو صارف کو کسی چیٹ میں موصول ہونے والے غیر پڑھے گئے پیغامات کا خلاصہ فراہم کرتا ہے، یہ سہولت انفرادی اور گروپ چیٹس دونوں میں کام کرتی ہے، تاہم گروپ چیٹس میں زیادہ مؤثر ثابت ہوتی ہے۔
یہ بھی پڑھیں: طلال چوہدری نے ٹی ٹی پی کا واٹس ایپ چینل بے نقاب کردیا، عالمی برادری سے کارروائی کا مطالبہ
اب واٹس ایپ نے اس فیچر کا نیا ورژن ’کوئیک ری کیپ‘ متعارف کرانے کی تیاری شروع کر دی ہے، جسے اینڈرائیڈ کے بیٹا ورژن میں آزمائشی طور پر شامل کیا گیا ہے، اس نئے فیچر کے ذریعے صارفین ایک وقت میں متعدد چیٹس کا خلاصہ حاصل کر سکیں گے، جو پہلے صرف ایک چیٹ تک محدود تھا۔
نئے ورژن میں ’کوئیک ری کیپ‘ کا آپشن مرکزی چیٹ ونڈو میں دستیاب ہوگا، جس کے ذریعے صارفین 5 چیٹس کا انتخاب کر کے ان کا خلاصہ حاصل کر سکیں گے، یہ آپشن تین نقطوں والے مینو میں دیگر شارٹ کٹس کے ساتھ موجود ہوگا، خلاصہ دیکھنے کے لیے چیٹ کھولنے کی ضرورت نہیں ہوگی بلکہ منتخب چیٹس کا خلاصہ خود بخود ہر چیٹ میں دستیاب ہوگا۔
مزید پڑھیں:میٹا کا واٹس ایپ میں اشتہارات متعارف کرنے کا فیصلہ، صارفین کے اعتراضات کیا ہیں؟
میٹا کی جانب سے دعویٰ کیا گیا ہے کہ یہ فیچر نجی پروسیسنگ اور اینڈ ٹو اینڈ انکرپشن پر مبنی ہے، جس کا مطلب ہے کہ صارفین کی گفتگو نہ تو میٹا کے سرورز پر محفوظ ہوتی ہے اور نہ ہی کسی تیسرے فریق کو اس تک رسائی حاصل ہوتی ہے، یوں صارفین کا پرائیویسی تحفظ برقرار رہتا ہے۔
تاحال یہ واضح نہیں کہ ’کوئیک ری کیپ‘ فیچر عام صارفین کے لیے کب دستیاب ہوگا، امکان ہے کہ اس کی دستیابی کے بعد اسے آئی فون کے صارفین کے لیے بھی متعارف کرایا جائے گا۔
مزید پڑھیں: وائس ریکارڈنگ اب پہلے سے بہتر اور آسان، واٹس ایپ کا نیا فیچر کیا ہے؟
میٹا کی یہ پیش رفت واٹس ایپ کے استعمال کو مزید سہل اور موثر بنانے کی جانب ایک اور قدم ہے، تجزیہ کاروں کا کہنا ہے کہ اگر یہ فیچر مؤثر انداز میں عام صارفین تک پہنچتی ہے، تو یہ روزمرہ چیٹنگ کے طریقہ کار کو بدل کر رکھ سکتی ہے اور واٹس ایپ صارفین کو پیغامات کی بھیڑ میں کھو جانے سے بچا سکتی ہے۔
