خیبر پختونخوا اسمبلی میں سینیٹ کی خالی نشست پر ضمنی انتخابات میں آزاد امیدوار مشعال یوسفزئی بھاری اکثریت سے کامیاب ہوگئی ہیں، یہ نشست سینیٹر ثانیہ نشتر کے استعفے کے بعد خالی ہوئی تھی۔۔
غیرسرکاری غیرحتمی نتیجے کے مطابق مشعال یوسفزئی کو 86 ووٹ ملے۔ مشعال یوسفزئی کو صوبائی اسمبلی میں حکومتی حمایت حاصل تھی۔
یہ بھی پڑھیے: پی ٹی آئی نے سینیٹ ضمنی انتخاب کے لیے مشعال یوسفزئی کو ٹکٹ جاری کردیا
ضمنی انتخاب میں ایوان کے 145 میں سے 143 ممبران نے ووٹ ڈالے، 3 ووٹ مسترد ہوئے جبکہ اپوزیشن کے حمایت یافتہ مہتاب ظفر کو 53 ووٹ ملے، آزاد امیدوار صائمہ خالد کو ایک ووٹ ملا۔
واضح رہے کہ اس سے قبل پاکستان تحریک انصاف (پی ٹی آئی) نے خیبر پختونخوا سے خواتین کی مخصوص نشست پر ہونے والے سینیٹ ضمنی انتخاب کے لیے مشعال یوسفزئی کو پارٹی ٹکٹ جاری کر دیا تھا۔
ذرائع کے مطابق ٹکٹ پارٹی بانی عمران خان کی ہدایت پر جاری کیا گیا جبکہ پارٹی چیئرمین بیرسٹر گوہر نے باضابطہ نوٹیفکیشن بھی جاری کر دیا ہے۔ دیگر امیدواران ساجدہ بیگم، مومنہ باسط، ثمیرہ شمش، اور صائمہ خالد کو 30 جولائی تک دستبردار ہونے کی ہدایت کی گئی تھی۔
مزید پڑھیں: سینیٹ ضمنی انتخاب میں پیپلز پارٹی 6 میں سے 4 نشستیں جیتنے میں کامیاب
ادھر عمران خان کی اہلیہ بشریٰ بی بی کی بہن مریم ریاض وٹو نے وضاحت کی تھی کہ مشعال یوسفزئی کی نامزدگی میں بشریٰ بی بی کا کوئی کردار نہیں۔ ان کا کہنا تھا کہ مجھے یقین ہے کہ بشریٰ بی بی نے مشعل کے لیے کسی بھی عہدے کی سفارش نہیں کی۔ ہمیں نہیں معلوم مشعل کو کس نے تجویز کیا۔
