خالصتان تحریک کے باوقار اور مؤثر رہنما ڈاکٹر امرجیت سنگھ نے 11 اگست کو شائع ہونے والی پاکستانی کتاب “The War That Changed Everything” کی بھرپور حمایت اور تعریف کی ہے، جس میں آپریشن سندور اور پہلگام سمیت دیگر اہم واقعات کے حقائق بے نقاب کیے گئے ہیں۔
ڈاکٹر امرجیت سنگھ کے اس بیان نے بھارت کے سیاسی حلقوں میں شدید کھلبلی مچا دی ہے، جہاں انہوں نے اپریل میں پہلگام میں بھارت کے فالس فلیگ آپریشن کی مذمت کی اور کہا کہ اس واقعے کو پاکستان پر جنگ کا بہانہ بنانے کے لیے استعمال کیا گیا۔ انہوں نے مزید کہا کہ 4 روزہ جنگ میں بھارت کا فوجی وقار اور سفارتی ساکھ مکمل طور پر متاثر ہوئی۔
ڈاکٹر امرجیت نے انکشاف کیا کہ بھارت نے 35 ممالک میں ایڈہاک ڈیلیگیشن بھیج کر سچائی چھپانے کی کوشش کی، مگر پاکستان کا عسکری اور سفارتی رتبہ عالمی سطح پر مزید بلند ہوا ہے۔ انہوں نے بھارتی حکومت اور میڈیا پر جھوٹے بیانیے چلانے کا بھی الزام عائد کیا۔
مزید پڑھیں: مودی سرکار پر دھاندلی الزامات اور عالمی تنہائی، سیاسی اور اقتصادی مشکلات میں اضافہ
تحقیقی صحافی احمد حسن العرابی اور مرتضیٰ سولنگی کی لکھی ہوئی یہ کتاب پہلگام اور دیگر واقعات پر مبنی شواہد کو تفصیل سے سامنے لاتی ہے۔ ڈاکٹر امرجیت سنگھ نے کہا کہ 20 مارچ کو چٹھی سنگھ پورہ میں 35 سکھوں کے قتل عام میں بھی بھارتی ایجنسیوں کا ہاتھ تھا، اور پلوامہ واقعہ میں بھی بھارت نے یہی جعلی داستان دہرائی۔
انہوں نے کہا کہ پہلگام کا واقعہ پاکستان کے لیے بھارت کو سبق سکھانے کا ایک تاریخی لمحہ تھا اور آئی ایس پی آر کی بریفنگز کے حقائق اب کتاب کی صورت میں دنیا کے سامنے آ رہے ہیں۔ کتاب کے شائع ہونے کے بعد یہ حقائق عالمی سطح پر بے نقاب ہوں گے۔
بھارتی میڈیا ڈاکٹر امرجیت سنگھ کے بیان کو متنازع قرار دینے کی کوشش کر رہا ہے، لیکن عالمی سکھ برادری نے ان کے موقف کی بھرپور حمایت کی ہے، جس کی وجہ سے مودی سرکار شدید پریشانی کا شکار ہے۔
