پاکستان کے 79ویں یومِ آزادی کے موقع پر نائب وزیراعظم اسحاق ڈار نے قوم کو دلی مبارکباد پیش کرتے ہوئے کہا ہے کہ ہمارے آبا و اجداد کی لازوال قربانیوں اور حق کی راہ میں ثابت قدمی سے ہی پاکستان معرضِ وجود میں آیا۔
یہ بھی پڑھیں:پاکستان کا 78واں یوم آزادی: ملک بھر میں سبز ہلالی پرچموں کی بہار، جگہ جگہ آتش بازی
انہوں نے اس عزم کا اعادہ کیا کہ جب تک قوم ’لا الہ الا اللہ، محمد رسول اللہ‘ کے پرچم تلے متحد ہے، کوئی طاقت ہمیں شکست نہیں دے سکتی۔
اسحاق ڈار نے حالیہ آزمائشوں کے پس منظر میں مسلح افواج اور عوام کے حوصلے کو سراہتے ہوئے کہا کہ ہماری اجتماعی ثابت قدمی نہ صرف عسکری تیاری کا مظہر ہے بلکہ ایک مؤثر خارجہ پالیسی کا بھی عکس ہے، جس سے پاکستان کو عالمی سطح پر وسیع حمایت ملی۔
انہوں نے قائداعظمؒ کے وژن کے مطابق باہمی احترام، علاقائی سکون اور امن پر مبنی سفارتکاری کے عزم کو دہراتے ہوئے کہا کہ پاکستان اپنے اسٹریٹجک و معاشی مفادات کو آگے بڑھاتے ہوئے پُرامن ہمسائیگی کو فروغ دے گا۔
اسحاق ڈار نے کہا کہ یومِ آزادی اور معرکہ حق کا دن ہمیں یاد دلاتا ہے کہ آزادی کے تحفظ کے لیے سرحدوں کا دفاع کرنے کے ساتھ ساتھ عالمی تعلقات میں سچائی، انصاف اور وقار کے اصولوں کو بھی برقرار رکھنا ضروری ہے۔
یہ بھی پڑھیں:جشن آزادی کی تیاریاں، شہری یوم آزادی کیسے منائیں گے؟
انہوں نے زور دیا کہ خارجہ پالیسی پاکستان کو ایک ذمہ دار، امن پسند جمہوری ملک کے طور پر پیش کرتی رہے گی جو شراکت داری، مکالمے اور علاقائی استحکام میں فعال کردار ادا کرے گا۔
اسحاق ڈار نے قوم سے اپیل کی کہ متحد رہیں، جمہوری اقدار کی حفاظت کریں اور ایک مضبوط، باوقار و خوشحال پاکستان کی تعمیر میں اپنا کردار ادا کریں۔
انہوں نے آخر میں نعرہ بلند کیا ’جشنِ آزادی مبارک۔ پاکستان زندہ باد‘۔
