حج درخواستوں کی وصولی میں ایک دن کی توسیع کردی گئی ہے جس کے تحت نامزد بینکوں میں پیر 18 اگست کو بھی درخواستیں وصول کی جائیں گی۔ تاہم آن لائن پورٹل آج 16 اگست رات 12 بجے بند کر دیا جائے گا اور اس میں مزید توسیع نہیں دی جائے گی۔
یہ بھی پڑھیں: سرکاری حج اسکیم میں درخواستوں کی وصولی کا آخری دن، درخواستیں ایک لاکھ 8 ہزار تک پہنچ گئیں
وزارت مذہبی امور کے ترجمان کے مطابق گزشتہ 12 دنوں کے دوران ایک لاکھ 10 ہزار سے زائد درخواستیں موصول ہو چکی ہیں جبکہ سرکاری حج اسکیم میں اب بھی 7 ہزار نشستیں دستیاب ہیں۔
ترجمان نے واضح کیا کہ حج درخواستوں کی وصولی ’پہلے آئیے، پہلے پائیے‘ کی بنیاد پر جاری رہے گی اور نشستیں مکمل ہوتے ہی درخواستیں روک دی جائیں گی۔
مزید پڑھیے: حج درخواستوں کی وصولی کا پہلا مرحلہ مکمل، 71 ہزار سے زیادہ درخواستیں جمع
گھر بیٹھے آن لائن درخواست دینے والوں کے لیے یہ آخری موقع ہے کیونکہ آن لائن پورٹل آج (16 اگست) ہی بند ہو رہا ہے تاہم بینکوں میں درخواستیں ایک دن اضافی مدت تک وصول کی جائیں گی۔
