وزیر اعلیٰ خیبر پختونخوا علی امین گنڈاپور نے صوبے کے مختلف اضلاع میں حالیہ سیلاب متاثرین کی مدد کے لیے اپنی ایک ماہ کی تنخواہ عطیہ کرنے کا فیصلہ کیا ہے۔
اسی طرح صوبائی کابینہ کے اراکین کی 15 دنوں کی تنخواہیں اور ممبران صوبائی اسمبلی کی 7 دنوں کی تنخواہیں بھی متاثرین کی امداد کے لیے مختص کی جائیں گی۔
وزیر اعلیٰ نے ہدایت کی ہے کہ اسکیل 17 اور اس سے اوپر کے ملازمین کی 2 دنوں جبکہ اسکیل ایک سے 16 تک کے ملازمین کی ایک دن کی تنخواہ سیلاب زدگان کے لیے دی جائے۔
مزید پڑھیں: حکومت نقصان کا 100 فیصد ازالہ کرے گی، وزیر اعلیٰ خیبر پختونخوا کا متاثرین سے وعدہ
علی امین گنڈاپور کے مطابق اس اقدام کے شفاف استعمال کو یقینی بنانے کے لیے پی ڈی ایم اے میں ایک خصوصی اکاونٹ کھولا جائے گا اور فنڈ کے ہر پیسے کا حساب رکھا جائے گا تاکہ عوام کو مکمل معلومات فراہم کی جا سکیں۔
وزیراعلیٰ نے کہا کہ سیلاب زدگان ہماری خصوصی توجہ اور تعاون کے مستحق ہیں اور مشکل کی اس گھڑی میں سب کو دل کھول کر متاثرین کی مدد کرنی چاہیے۔
انہوں نے یقین دلایا کہ عطیات کے استعمال میں شفافیت کے لیے تمام اقدامات کیے جائیں گے اور فنڈز صرف ضرورت مند افراد تک پہنچیں گے۔
