وزیراعظم محمد شہباز شریف نے حالیہ شدید مون سون بارشوں اور سیلابی صورتحال کے پیشِ نظر مختلف سیاسی رہنماؤں سے ٹیلیفونک رابطے کیے اور قیمتی جانوں کے ضیاع پر گہرے دکھ اور افسوس کا اظہار کیا۔
ریڈیو پاکستان کے مطابق وزیراعظم نے چیئرمین پاکستان پیپلز پارٹی بلاول بھٹو زرداری سے بات چیت کرتے ہوئے سندھ خصوصاً کراچی میں شدید بارشوں اور اربن فلڈنگ سے ہونے والے جانی و مالی نقصانات پر افسوس کا اظہار کیا۔ انہوں نے سندھ حکومت کو وفاقی حکومت کی مکمل امداد اور تعاون کی پیشکش کی۔
یہ بھی پڑھیں وزیراعظم شہباز شریف کا گلگت بلتستان میں انفراسٹرکچر کی بحالی کے لیے 4 ارب روپے کے فنڈز کا اعلان
وزیراعظم نے چیئرمین این ڈی ایم اے کو ہدایت کی کہ وہ سندھ حکومت کے ساتھ قریبی رابطے میں رہیں، پی ڈی ایم اے کو ہر ممکن تعاون فراہم کریں اور عوام کو ممکنہ خطرات سے پیشگی آگاہ کریں۔
وزیراعظم نے امیر جماعتِ اسلامی پاکستان حافظ نعیم الرحمن سے بھی ٹیلیفونک گفتگو کی اور خیبر پختونخوا میں بارشوں سے ہونے والے نقصانات اور جاری امدادی سرگرمیوں پر تبادلۂ خیال کیا۔ انہوں نے الخدمت فاؤنڈیشن کے فعال کردار کو سراہا جو متاثرہ علاقوں میں ریسکیو اور ریلیف آپریشنز میں پیش پیش ہے۔
یہ بھی پڑھیے وزیراعظم شہباز شریف سے چیئرمین این ڈی ایم اے کی ملاقات، امدادی سرگرمیوں کا جائزہ
وفاقی وزیر برائے تعلیم و پیشہ ورانہ تربیت ڈاکٹر خالد مقبول صدیقی سے گفتگو کے دوران وزیراعظم نے سندھ میں حالیہ بارشوں اور متوقع بارشوں سے پیدا ہونے والے خدشات پر بات کی اور وفاقی اداروں بشمول این ڈی ایم اے کی طرف سے بھرپور تعاون کی یقین دہانی کرائی۔
وزیراعظم نے کہا کہ وفاقی حکومت صوبائی حکومتوں کے ساتھ کھڑی ہے اور ہر ممکن تعاون فراہم کرے گی تاکہ عوام کو محفوظ رکھا جا سکے اور متاثرہ علاقوں میں بروقت امداد پہنچائی جا سکے۔
