گنیز ورلڈ ریکارڈز نے اپنی 70ویں سالگرہ کے موقع پر دنیا بھر میں قائم کیے جانے والے انوکھے اور حیران کن ریکارڈز کی تصویری جھلکیاں جاری کی ہیں۔
یہ ادارہ پہلی مرتبہ 27 اگست 1955 کو منظر عام پر آیا تھا، جب لندن کے ایک جم کے اوپر والے کمرے میں پہلی گنیز بک آف ورلڈ ریکارڈز مرتب کی گئی۔ تب سے اب تک یہ کتاب دنیا بھر میں غیر معمولی کارناموں اور حیران کن ریکارڈز کی پہچان بن چکی ہے۔
یہ بھی پڑھیں: ساون، چائے اور موسیقی: بارش میں بھیگتے بل بورڈ کو گنیز ورلڈ ریکارڈ کا اعزاز کیوں ملا؟
70ویں سالگرہ پر گنیز ورلڈ ریکارڈ کی جانب سے جاری کی گئی تصویری جھلکیوں میں مختلف افراد اور جانوروں کے عالمی ریکارڈز کو دکھایا گیا ہے۔
ڈیب ہاف مین کے پاس وِنی دی پوہ اور فرینڈز کا سب سے بڑا کلیکشن موجود ہے، جس میں 23,623 اشیاء شامل ہیں۔
برطانیہ کے ڈیو والش نے 9,360 کلوگرام وزنی ٹرک وہیل چیئر سے کھینچ کر ریکارڈ بنایا۔
امریکا کے این ایبیٹے نے 3.18 کلوگرام وزنی سب سے بڑا ہاٹ ڈاگ متعارف کرایا۔
لندن کی لیزا ڈینس نے 83.98 سیکنڈ میں 1,000 چھت کی ٹائلز توڑ کر خواتین کا ریکارڈ قائم کیا۔
پولینڈ کا گھوڑا بومبل دنیا کا سب سے چھوٹا گھوڑا قرار پایا، جس کا قد صرف 56.7 سینٹی میٹر ہے۔
ٹیکساس، امریکا کا کتا زیوس دنیا کا سب سے لمبا کتا تسلیم کیا گیا۔
بیتھ جانسن نے دنیا کے سب سے بڑے یو یو کو کامیابی سے آزما کر ریکارڈ بنایا۔
بگ فوٹ 5 دنیا کا سب سے بڑا مونسٹر ٹرک قرار دیا گیا، جس کا وزن 17,236 کلوگرام ہے۔
برطانیہ کی ہرنام کور دنیا کی سب سے کم عمر مکمل داڑھی والی خاتون ہیں۔
بھارت کی جیوتی امجے دنیا کی سب سے چھوٹی قد کی زندہ خاتون قرار پائیں۔
جنوبی افریقہ کا برٹی دنیا کا سب سے تیز رفتار کچھوا ہے۔
ڈیمٹری پینسیرا نے 125 آئس کریم اسکوپ ایک کون پر رکھ کر ریکارڈ بنایا۔
شکاگو کی کم گڈمین نے 12 ملی میٹر تک آنکھیں باہر نکالنے کا ریکارڈ قائم کیا۔
ادارے کا نیا چیلنج کیا ہے؟
دنیا بھر میں منفرد کارناموں کا ریکارڈ رکھنے والی معروف کتاب گنیز ورلڈ ریکارڈز نے اپنے قیام کے 70 برس مکمل ہونے پر شائقین کو ایک نیا چیلنج دے دیا ہے۔ ادارے نے اعلان کیا ہے کہ دنیا بھر کے لوگ 70 ایسے ریکارڈز بنانے کی کوشش کرسکتے ہیں جو اب تک ان کلیمڈ ہیں اور کسی نے قائم نہیں کیے۔
گنیز ورلڈ ریکارڈز کی پہلی اشاعت 27 اگست 1955 کو لندن کے ایک جم کے اوپر کمرے میں مرتب کی گئی تھی۔ اس تاریخی موقع کو یادگار بنانے کے لیے ادارہ اپنے چاہنے والوں کو دعوت دے رہا ہے کہ وہ غیر قائم شدہ ریکارڈز میں حصہ لیں۔
یہ بھی پڑھیں: پاکستانی رکشہ ڈرائیور نے بھارتی مارشل آرٹسٹ کا گنیز ورلڈ ریکارڈ توڑ ڈالا
ان میں 400 میٹر سیک ریس کا سب سے تیز وقت، سکّے کو کپ میں اچھال کر ڈالنے کا سب سے طویل فاصلہ، بوتل فلپ کا سب سے طویل فاصلہ، 30 سیکنڈ میں سب سے زیادہ ہائی فائیوز، 5 منزلہ کارڈ پیرا مڈ تیز ترین وقت میں بنانا، سب سے تیز برّیٹو تیار کرنا اور اسکرابل ٹائلز کو تیز ترین وقت میں حروف تہجی کی ترتیب میں لگانا شامل ہیں۔
اس موقع پر گنیز ورلڈ ریکارڈز نے اپنی ویب سائٹ پر ایک نیا ریکارڈ سلیکٹر کوئز بھی متعارف کرایا ہے جو شائقین کی شخصیت کے مطابق انہیں موزوں ریکارڈ توڑنے یا بنانے کے چیلنج تجویز کرے گا۔
یہ بھی پڑھیں: گنیز ورلڈ ریکارڈ یافتہ دنیا کے معمر ترین شخص کا انتقال ہوگیا
ادارے کے ایڈیٹر ان چیف کریگ گلینڈے نے کہا کہ ہم اپنی پہلی اشاعت کے بعد 7 دہائیوں پر محیط شاندار تاریخ پر فخر کرتے ہیں۔ اس عرصے میں دنیا بھر سے حیران کن کارنامے، طاقت، مہارت اور برداشت کے بے شمار ریکارڈ سامنے آئے اور یہ سلسلہ آئندہ بھی جاری رہے گا۔
انہوں نے مزید کہا کہ اب ہم موجودہ اور آئندہ نسل کے ریکارڈ ہولڈرز کو خوش آمدید کہہ رہے ہیں۔ چاہے لوگ ہمارے نئے ریکارڈ سلیکٹر ٹول کو استعمال کریں یا 70 ان کلیمڈ ریکارڈز میں سے کسی کو آزمانا چاہیں، سب کے لیے مواقع کھلے ہیں۔
