آثار قدیمہ کے ماہرین کو کروشیئن جزیرے کے ساحل پر بحیرہ ’ایڈریاٹک‘ کی تہہ سے ایک کچی شاہراہ ملی ہے جس کے بارے خیال ہے کہ یہ 7000 سال پہلے تعمیر کی گئی تھی۔
آثار قدیمہ کے ماہرین کا کہنا ہے کہ ’پتھر کے زمانے کی یہ کچی شاہراہ پہلے ’نیولیتھک سائٹ‘ کا حصہ تھی۔ سمندر کے پھیلاؤ سے اب یہ شاہراہ ’کورچولا‘ جزیرے کا حصہ بن گئی ہے۔
’کورچولا‘ 8,000 سال قبل سرزمین کروشیا سے منسلک رہا ہے تاہم آخری برفانی دور (تقریبا 12,000 قبل مسیح) میں سطح سمندر میں اضافہ ہوا جس سے ’نیو لیتھک‘ جہاں سے یہ شاہراہ دریافت ہوئی جزیرہ ’کورچولا‘ کا حصہ بن گئی۔
ماہرین آثار قدیمہ کا خیال ہے کہ 13 فٹ چوڑی اس شاہراہ کوایک تہذیب ’ہاور‘ کے دور میں تعمیر کیا گیا ہے۔
سیٹلائٹ تصاویر کو دیکھنے کے بعد یونیورسٹی آف زادر کے ماہر آثار قدیمہ میٹ پاریکا نے اس شاہراہ کو قریب سے دیکھنے کا فیصلہ کیا اور اپنے ساتھیوں کی ایک ٹیم کے ہمراہ سمندرکی تہہ میں جا کراس کی تصاویر، سائز اور دور کے حوالے سے تمام تر تفصیلات اکٹھی کر لیں۔
خوش قسمتی کی بات یہ ہے کہ یہ علاقہ بحیرہ روم کے بیشتر حصوں کے برعکس بڑی لہروں سے محفوظ رہا ہے۔
یونی ورسٹی آف زادر نے سماجی رابطے کی ویب سائٹ پر ایک بیان میں کہا کہ غالب امکان ہے کہ لوگ تقریباً 7,000 سال پہلے اس شاہراہ پر چلتے رہے ہیں۔
