بھارت کی ریاست اترپردیش کے ضلع ہردوئی کے رہائشی جتیندر کمار کی گمشدگی کا معمہ برسوں بعد اس وقت کھلا جب وہ سوشل میڈیا رییلز پر دوسری عورت کے ساتھ نظر آیا۔
جتیندر کمار نے 2017 میں شیلو نامی خاتون سے شادی کی تھی۔ شادی کے کچھ عرصے بعد بیٹے کی پیدائش ہوئی لیکن پھر اچانک وہ لاپتا ہوگئے۔ اپریل 2018 میں گمشدگی کی ایف آئی آر درج کرائی گئی اور پولیس کی تلاش کے باوجود ان کا کوئی سراغ نہ مل سکا۔ اس دوران جتیندر کے اہلِ خانہ نے شیلو کے رشتہ داروں پر اُنہیں غائب کرنے کا الزام بھی عائد کیا۔
یہ بھی پڑھیے: ایرانی خاتون نے 23 برسوں میں 11 شوہر قتل کردیے، وجہ کیا تھی؟
تاہم اب شیلو نے اپنے شوہر کو سوشل میڈیا رییلز میں لدھیانہ میں ایک دوسری عورت کے ساتھ دیکھ لیا ہے۔ ان ریلز کے وائرل ہونے کے بعد شیلو نے دعویٰ کیا کہ اُن کے شوہر نے دوسری شادی کر لی ہے اور اسی عورت کے ساتھ رہ رہے ہیں۔
شیلو کا کہنا ہے کہ میں نے 2017 میں شادی کی اور ایک بیٹے کی ماں بنی۔ میرا شوہر لاپتا ہوگیا تھا۔ اب رییلز کے ذریعے پتہ چلا کہ وہ لدھیانہ میں ایک عورت کے ساتھ رہ رہا ہے اور شادی بھی کر لی ہے۔
اس معاملے پر ایڈیشنل سپرنٹنڈنٹ پولیس نریپیندر کمار نے بتایا کہ شادی کے ایک سال بعد جتیندر کمار بغیر بتائے گھر سے چلا گیا تھا جس پر گمشدگی کی ایف آئی آر درج ہوئی۔ اب بیوی کی درخواست پر پولیس نے دوبارہ تحقیقات شروع کردی ہیں اور مناسب قانونی کارروائی کی جائے گی۔
