آسٹریلوی پولیس نے ایک 41 سالہ شخص کو گرفتار کرلیا ہے جس پر الزام ہے کہ اس نے 1 لاکھ 60 ہزار ڈالر سے زائد مالیت کا لیگو (Lego) چوری کیا۔ پولیس کے مطابق یہ اب تک کی سب سے بڑی کارروائی ہے جس میں خوردہ سامان کی چوری کا اتنا بڑا ذخیرہ برآمد ہوا ہے۔
یہ بھی پڑھیں: لیگو کی 90ویں سالگرہ، 94 ہزار بلاکس کا کیک تیار
پولیس کے مطابق رائل پارک ایڈیلیڈ کے مغربی مضافات میں ایک مکان پر چھاپے کے دوران تقریباً 2 ہزار 500 چوری شدہ اشیا برآمد ہوئیں جن میں 1 ہزار 700 سے زائد سیل پیک لیگو سیٹس شامل ہیں۔
اسسٹنٹ کمشنر جان ڈی کانڈیا نے بیان میں کہا کہ ’یہ چوری محض ایک چھوٹا واقعہ نہیں بلکہ بڑے پیمانے پر جرائم کی نشاندہی کرتا ہے۔ جو لوگ سستی اشیا آن لائن خریدتے ہیں وہ نادانستہ طور پر ایسے جرائم کو تقویت دیتے ہیں۔‘
یہ گرفتاری ’آپریشن میژر‘ کے تحت عمل میں آئی، جو مارچ 2022 میں دکانوں سے چوری اور بار بار جرم کرنے والے ملزمان کے خلاف شروع کیا گیا تھا۔
یہ بھی پڑھیں: کروز شپ کمپنی نے لیگو بوٹس بنانے کا عالمی ریکارڈ قائم کرلیا
پولیس کے مطابق اب تک اس آپریشن کے دوران تقریباً 6 ہزار وارداتوں کو ملزمان سے جوڑا جاچکا ہے جبکہ 2 ہزار 425 گرفتاریاں بھی عمل میں لائی گئی ہیں۔
پولیس کا کہنا ہے کہ صوبے میں چوری کے کیسز میں کمی ریکارڈ کی گئی ہے جس کا سہرا اس آپریشن کے سر جاتا ہے۔
