پنجاب بھر میں نافذ دفعہ 144 میں توسیع کردی گئی ہے جبکہ دفعہ 144 کی خلاف ورزی پر حراست میں لیے جانے والے افراد کی تعداد 3 ہزار کے قریب ہوگئی۔
صوبہ پنجاب میں نافذ دفعہ 144 میں مزید 4 روز کے لیے توسیع کردی گئی ہے۔
دفعہ 144 میں توسیع کا نوٹیفکیشن ایڈیشنل سیکرٹری ہوم نے جاری کیا۔
نوٹیفکیشن کے مطابق پنجاب بھر میں جلسے، جلوس، ریلی اور ہر قسم کے اجتماع پر پابندی عائد ہوگی۔
واضح رہے کہ پنجاب بھر میں دفعہ 144 کی خلاف ورزی پر اب تک متعدد لوگوں کو حراست میں لیا جاچکا ہے۔
ترجمان پنجاب پولیس کے مطابق ہنگامہ آرائی اور شرپسندی میں ملوث گرفتار افراد کی تعداد 2829 ہوچکی ہے۔ ان میں پی ٹی آئی کے مرکزی ، صوبائی اور ضلعی عہدے داران بھی شامل ہیں۔
